Daily Newspaper

Editorial…..

12

Zirnaah chhungkaw tanrualna
Tun hnaia education minister hova zirna lam kaihhnawih hotute thukhawm chuan Ministry of Home Affairs ruahmanna anga sikul hawn dan tur ngaihtuahin, high school leh higher secondary school bikah zirlaite chu sikul kal phalsak ni tawh se tiin an rel a. Hei hi mahni duhthu (voluntary basis) a ni ang tih a ni.

Order-a a lan danin, sikul kai turte hian an nu leh pate emaw an guardian te emaw remtihna ziakin an keng tur a ni a. Zirtirtute leh thawktu dangte pawh an vaiin an kal dawn lova, a zatve vela inkal chhawk tura ruahman a ni a. Naupang zirtir dan turah chuan school tinin anmahni remchan dan angin ruahmanna siam mai tura tih a ni. High school chin hnuai lam erawh ruahmanna a la awm lo thung.

Hetih lai hian, University Grants Commission pawhin university leh college academic session chu November 1 atangin tan a nih tur thu a puang tawh bawk a. Academic hun hloh tawh hnawhkhah a nih theih nan UGC chuan college te chu kar khatah ni ruk zirtir hna thawk turin a ti a, kumina thlasik chawlh leh nakum nipui chawlh pawh tum dang aia rei lo tura ruahman a ni bawk.

Tun dinhmunah Mizorama sikulte’n zirna ina kal lovin ‘Week-wise Plan’ leh ‘online class’ hi an nei mek a ni a. Hrileng avanga hun rei tak zirna in khar a nih hnua hetia ruahmanna siam a ni thei ta hi a lawmawm rual rualin, hrileng avanga timna erawh a awm lo thei dawn lo niin a lang a. Tuna ruahmanna thar hnuaiah pawh hian, zirlaite hi sikul-a kal hum hum a rem dawn chuang lo niin a lang a, a chhan pawh SOP hnuaiah engkim kalpui vek a ngaih dawn tho avangin social distancing zawm chung chuan hmunhma pawhin a daih thei dawn lo tihna a ni. Online class nei mek zinga a harsa zual, zirtirtuten hmaichhana an zirtir ngaite erawhin zirna inah zirtirtute an râwn thei dawn tihna ang deuh chauh niin a lang. Chumi a nih avang chuan, zirna ina kal kher ngai zirlaiten nu leh pate remtihna ziaka an ken pawh a ngai dawn ta a. A nihna takah chuan, zirna ina kal thei turin sawrkarin ruahmanna a siam a, kal leh kal loh chu mahni thu (voluntary basis) a ni dawn tihna mai a ni awm e.

Hrileng avangin nunphung a khaihlak vek a, zirna kalpui chungchangah pawh ‘risk’ la chunga kalpui a ngai ta a ni ber a. Hei hi kan dinhmun a nih miau si avangin, tunhma zawng aia chhungkuaa tanrual a ngai lehzual dawn niin a lang a. Hei hi nu leh pate pawhin kan hriatthiam a pawimawh dawn hle niin a lang.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy