Daily Newspaper

Editorial…..

11

Min ngaihthah em?
Rajya Sabha Monsoon session neih mekah Mizoram Rajya Sabha MP Pu K. Vanlalvena chuan Mizoram chhung Myanmar ramri hnaih Champhai District leh Serchhip District khaw thenkhata lirnghing chungchang sawichhuakin, Mizorama lirnghing ang zat hi state dangah thleng nise tun ang hian sawrkar laipui chuan a ngaihthah lovang, tih a sawi chhuak a. MP chuan, Ministry of Home Affairs leh Earth Sciences hnenah a rang thei ang bera Investigation team Mizorama tir lut tur te, lirnghing tuartute hnena compensation pe turin leh lirnghing tuartute hnena an tawm hulna tur pe tur tein a ngen nghal a. Hei bakah hian Mizoram hnenah lirnghing zirna hmanrua pe turin a thlen bawk a ni.

MP-in a sawi ang hian, state dang thenkhata chhiatna a thlen thulha chhawmdawlna sawrkar laipuiin a pek dan leh a ngaihsak dan hi chanchinthar lamah langsar taka pholan a ni thin a. Tuna Mizoramin hetianga lirnghing kan tawrh dan hi sawrkar laipuia a kaihhnawih ministry hnenah hian Mizoram sawrkar hian eng ang takin nge a lo thlen tawh tih hi mipui lam chuan hre kilh kelh lo mah ila, tunhnaia Rajya Sabha MP-in Zero hour-a lirnghing a sawichhuah paha ngenna a thlente hi sawrkar laipui beng thleng tura hmalakna awmchhun a la ni mai em ni tih hi zawhna a ni awm e.

Mizoram hi lirnghing na tak thlen theihna hmun a ni tih hi chu mi pangngai chin pawhin kan hre hneh hle tawh a, kuminah vawi za aia tam lirnghingin min sawi tawh a, chumi hnuah hun rei tak a inchiah leh tawh a. Tuna parliament session neih laia MP-in lirnghing chungchanga ngenna a thlen leih leih a nih chuan, sawrkar laipui hian min ngaihthah vang nge, keimahni hi kan lo inngaihthah zawk tih hi ngaihtuah theih tak a ni awm e.

Tuna MP kan neih pahnihte hi an zam a thain, tunhnaia sawrkar laipui beng thleng tura chet an lak dan thawm hriattur a awm chho ta zut mai hi a lawmawmin a thlamuanthlak hle a. Rajya Sabha MP-in Ayurveda Bill sawihonaa medicinal plant lama Mizoram dinhmun a thlen te leh, Medicinal plant hmanga damdawi siamchhuahna tur ‘micro and small-scale industry’ Mizorama din tura a ngenna te kha bawhzui a, a hlawhtlin theih nana umzui ngar ngar chi a ni awm e.

Sawrkar laipuiin min ngaihthah bik anga ngaih theiha kan awm hian, inenfiahna tur kan nei em tih hi ngaihtuah ve ila. State dangin sawrkar laipui an dawr ang hian kan dawr taima tawk lo deuh nge, Sawrkar laipui hian min ngaihthah ve hrim hrim tih hi zawhna lian tak a ni. Ngaihtuah loh theih lohva sawrkar laipui kan zarbuai ve te pawh hi a tul a ni mai lo maw?

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy