Daily Newspaper

Editorial…..

12

Dan kenkawh leh mipui

Tun hnaia Pathiannia Bawngkawn traffic point-a thil thleng chuan social media lamah sawizui a la hlawh deuh reng a. Social media lama thu a than dan chuan, Bawngkawn Sairang road kawngkama dan kalha lirthei ding thinte chu traffic lamin an man khawm a, hei hi tunhnaia truck driver leh police te inkar thil thlengin a hrinchhuah nia ngaih theih turin an sawi hlawm a ni.

A enga pawh chu lo ni se, Sairang road kawngkama lirthei dah (parking) hi danin a phal loh sa a nih avangin, dan kengkawhtute chuan englai pawhin an man thei tihna a ni a; mahse man lovin, hriatthiamna nen an lo thlir liam deuh mai mai te pawh a ni thei. Tun hnaia thil thleng avanga dan hi khauh zawka kengkawh leh hnuhnawh chauh an nih phei chuan, dan kengkawhtute hian dan an kengkawh tha lo tihna a ni nghal awm e. Hei hi social media lama titi êng atanga ngaihdan awm thei tak a ni.

Tun hnai thil thlengin a hrinchhuah, social media lama lang zui ta hi chu a enga pawh ni se, a thuhrimin, dan kenkawh kawngah hian sawrkar lam pawh hian intuaithar deuh chu a mamawh niin a lang a. Thil tam tak zingah entirna pakhat han tarlang ila. Bawlhhlawh paih chungchangah hian, thuneituten khapna dan/mipui hriattirna an tihchhuah hian, chu chuan zawm a hlawh em tih enzui kawngah sawrkar hi a mawng a rit deuh thin niin a lang a. Hei hi sawifiah vak ngai lovin, Aizawl khawpui daifem khawi hmunah pawh hian bawlhhlawh paihna hmun ni loa bawlhhlawh paih te, leivung paihna hmun tur ni lova kawngkama leivung chhung liam ta mai mai te a taka hmuhtur a awm deuh zut reng a ni. Bawlhhlawh paih chungchang hi chu entirna pakhat a ni mai a, thil dang dangah pawh, khapna thupek tihchhuah a nih hian, chu chuan zawm a hlawh leh hlawh enzui kawngah sawrkar hian a tihtur a ti tawk lo hlein a lang. Dan zah tak tak leh dan zawm tha tak tak an awm laiin, mihring kan inanloh avangin, Dan kenkawh that loh avanga dan bawhchhiat mai duh hi kan tam tih a lang reng a ni.

Hetih lai hian, mipui lam pawhin khua leh tui tha nih tuma kan mawhphurhna kan hriat hi a pawimawh hle a. Dan zah tak leh dan zawm tha tak kan nih pawhin, dan bawhchhetute thlir liam mai lova, thil dik lo titute chu an tih dikloh dan hrilh a, siam that tum kawngah tun aia kan taimak hi a pawimawh dawn hle niin a lang. Thil sual titute en liam mai mai hi khua leh tui tha tihtur niin a lang lo.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy