Daily Newspaper

Editorial…..

9

Session-a zawhna leh chhanna hun hi….

Mizoram Legislative Assembly pariatna thutkhawm vawi 6-na ni thum chhung awh chu nimin September ni 3 khan zawhfel a ni ta a. Tun tum session zawhna leh chhanna hun atan hian starred question lut admit 239 zinga 60 chu list of business-ah dah a ni a, heng zinga pariat chiah hi session chhung khan chhan hman a ni.

Session tawp ber ni khan zawhna pathum chhan hman a ni a. Zawhna hmasa ber, supply chungchangin minit 34 chuang hun a la a, zawhna pahnihna, Lunglei circuit house chungchangin minit 25 chuang hun a la bawk a. Zawhna hnuhnung ber phei chu hun tawp hma second 10 chauh a la awmah zawhna zawttuin a zawt hman awrh a, a zawhna pawh chhiar chhuak hman lovin question nambar chauh a sawi a. A chhangtuin a chhan mek laiin hun a tawp a, hun a tawp hnuah zawhna chhangtu chu chhan zawhtir hram a ni bawk.

Assembly session-ah hian zawhna leh chhanna hun atan darkar khat chhung hman a ni thin a, hei hi India ramin tih dan phung nghet taka a neih mek a ni a. Zawhna leh chhanna hunah hian member thenkhat, an ngaih pawimawh zawng zehna hun remchanga hman talh tum an awm avangin, zawhna nena inpersan tak tak zawh belhnaah a lut thin a, chu chuan zawhna dang zawhna hun a lak hek nasat thin avangin zawhna tam zawkin a tuar ta thin a ni.

Session neih a nih hian, eng session pawh ni se, mipui lamin an lo bengkhawn leh an nghahhlelh ber pakhat chu zawhna leh chhanna hun hi a ni thin a. Ram chhunga thil thleng issue lian tak a awm chang phei chuan, mipuiin an nghakhlel zual thin.

Mipui aiawha rorel tura thlan chhuahte hi an quality enna ber pakhat chu House chhunga an chet dan atang hian a ni thin. Member thenkhat chu, zawhna nena inpersan taka thil dang sermon ta chiam te an awm a, zawhna nena inhne rem chiah lo an zeh tel avanga hun ral hi a uiawm thin hle a, nghakhlel taka zawhna dang lo beiseitu mipuite tan a beidawnthlak duh hle awm e.

Budget sawihonaah, thenkhat chuan budget kaihhnawih nena inpersan tak sawi an ching bawk a, hetiangah hi chuan, hun bituk chhung bik nei an nih avangin a ngaihthiam theih deuh ang a; mahse, budget kaihhnawih ni lem lo, budget nena inpersan daih an sermon thin chuan, chu chu mipui lam beisei dan a nih a rinawm loh a ni.

Mipui lam hian session neih laia House member-te thu leh hla hi ngun takin an lo chik thin a, tunge ram leh hnam hnuk khawih thil vei tak tak tih hi an lo teh ve thin a. A bikin, zawhna leh chhanna hun hi mipui tan a hlu zual a; chuvangin, House Member-te hian mipui beisei dan thlir tel chunga he hun hi tangkai taka an hman thiam hi a duhawm hle a ni.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy