Daily Newspaper

Editorial…..

11

Ngaih pawimawh hmasak tur…

Covid-19 hrilengin min han nuai a, ei leh bar, sum leh pai dinhmuna derthawngsa Mizoram chu kan bet rawk rawk a ni ber. Hrileng avangin inkalpawhna a tawp a, state dang atanga mamawh lo lut thin a han chatlak zeuh chhung ringawt pawh khan kan talbuai hman a. Kan state chhunga kuthnathawktute tharchhuah awmchhun kha innghahnan kan hmang a, kan ro vawng vawng a nih ber kha. Kan hma lam hun hriat a ni lo nachungin, tuna kan dinhmun atang hi chuan hma lam hi thui tak chu a hmuh lawk theih deuh ruak a, kan dinhmun thlira ngaih pawimawh hmasak tur hi chu a langchiang lehzual ta hle a ni.

Ram inrelbawlnaah a pawimawh hmasa chu ei leh bara intodelh a ni, tiin ram hruaituten inthlan dawnah an sawi thin a, chutiang chuan kum sawmli chuang kan kal tawh a, tun thlengin ei leh bar, a enga mahah intodelhna kan la nei lo va. Tuna Covid-19 hrilengin min han nuai hnu hian, agriculture leh horticulture lam an han phe deuh suau a. Hun a han kal leh deuh a, sawrkar laipui atanga buhfai leh state dang tharchhuah thlai leh eitur a rawn luh theih leh tak avang hian, kan ngaih kan ti tha leh ta mai nge, laiking pawnpui tah tur an sawi hi kan ang leh mai ang tih a hlauhawm hle.

Tuna kan dinhmun avang chauh tal pawh hian, ei leh bar thawhchhuah kawnga hmasawn zawkna tur hi, thildang aia dah pawimawh hmasak bera neih a, Green revolution tinzawna hmalakna kalpui nghal mup mupna awm tak a ni tawh a. Environment tichhetu, kum tina ramngaw thiata eizawnna thingtlang loneih kan kalpui mek thlakna tura leilet siam theihna ram zau tak, hectare singnga chuang la awm te hi, tun hun hi a bawhna hun remchang tak a ni lehzual awm e.

Tun hnaia session neih zawh takah khan, Mau chungchanga ‘risk lak’ chungchang khan a hnu lamah sawi zui a hlawh hle a. Ngunthluk taka ngaihtuahna seng chunga tha tur nia ngaihah chuan, ‘risk lak’ hun te pawh a awm chang a awm ang a. Chutih laiin, kan tun dinhmun mek nena thlir chuan, ei leh bara intodelhna tur lama ‘risk lak’ hi ngaih pawimawh hmasaka nei tur kan nih a rinawm.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy