Daily Newspaper

Editorial…..

6

Kan tangrual thiam em?

Kum 2020 Chapchar Kut post souvenir, nimina a tlangzarhnaah chief minister chuan, Covid hrileng karah pawh state dangte nen khaikhin chuan Mizoram chu hma la tha ber a ni a; hei hi a chhan chu mipui tanrualna leh tlawmngaihna te, inthununna nei tha kan nih vang a ni, tiin a sawi a. Mizo hnam ziarang leh nunphungah hian midang tan entawntlak tak tak a awm, tiin a sawi bawk.

Hrileng avangin kan ram dinhmun a derthawng a, ram leh hnamin harsatna lian tak a han tawh tak tak chuan, inphut chhuah leh intirh luih pawh ngai lovin Mizo nula leh tlangval rual chu a sur a sa hnuaiah, zum leh hriam karah, ramri lam panin an liam zung zung a. Chutih laiin, khawtual lamah pawh a tul tul thawkin an insem darh sung sung a. Covid-19 hrileng hian tunhma pi leh pute hun laia sa leh ral laka khawtlang chhanhim tura an lo tanrual dan hlimthla kha a phawk chhuak kan ti thei awm e. Hetih lai hian, hrileng laka ram leh hnam chhan tura kan thawk chhuak a, kan tangrual ang hian, Mizoram mipuite himna tiderthawng thei thil chi hrang hrang lakah hian kan tangrual thiam takmeuh em, tih hi zawhna lian tak a ni awm e.

A hmasa berah chuan, sumdawnna kawngah hian kan tangrual thiam chiah em tih hi inenfiah nan kan hman a tul ta hle niin a lang. Hnamdang sumdawngten sum leh pai itawm tham tak tawktarhin a ram leilung fate hming leh nihna hmangin sumdawnna an luhchilh thuk ta hle a. Hemi kawngah hian, Covid-19 laka mipui himna tura kan tanrual thiam ang bawka kan tanrual thiam hi a ngai niin a lang. India ram khua leh tui vek kan ni a, hnamdangte hi hmel huat a, a pawng ataka tharum hmanga nek ngawt theih a ni lova, tharum tel lova tanrual thiam hi a pawimawh zawk chu a ni.

Mizoram buai hnu kum 1967-a Pu Hrangchhuana’n Silchar khawpuia damdawi zawrhna dawr a hawn chungchang kha kan hria ang a. Mizopa dawr chu vaihovin an dawr loh nan, cheng khat mah hlawh nei lovin vai tlangval an duty nitin a, dawrtu an awm miau loh avangin a hnuah dawr hi tihtawp loh theih a ni ta lo va. Hetiang bawk hian hotel te pawh Mizo ten an han hawng ve thin a, an daih rei ngai lo. Hetiang hian i ti ve ang u kan ti lo; mahse hnam rilru kan put thiam a ngai tih erawh a lang.

Tunah chuan, kan ramah hnamdangin dawr an rawn hawng a, a ram leilung fate zawk hian hma lam huna kan tu leh tuchhuante dinhmun zel tur ngaihtuah thleng pha lovin kan hming leh nihnate kan hman hawhtir duh ta hial mai. Tuna Covid-19 avanga hnam ziarang leh nunphung lo langchhuak kan tih hi, thildangah pawh lang chhuak zel se a duhawm hle a, kan tangrual thiam takmeuh em tih hi inenfiahnan kan hman a pawimawh dawn ta hle a ni.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy