Daily Newspaper

Editorial…..

9

Dik lo siamtha turin mipui pawimawh

Legal Metrology Enforcement chuan tunhnai khan an thudawn bawhzuiin silaimu zawrhna dawr pakhat atanga maximum retail price aia sanga silaimu hralhtu chu, Sec 18 (2) of the Legal Metrology (Packaged Commodities) Rules 2011 hmanga thubuai siamsakin, silaimu packet 21 leh cartridges 9 an mansak a. Silaimu hi packet khatah mu 10 awmin, Rs 1200 (MRP) man a ni a, hei hi silaimu zuartu chuan customer hnenah Rs 2500/- in an hralh thin niin sawrkar thuchhuah chuan a tarlang a ni.

Legal Metrology lam hian, thil zawrh, a man inziak Maximum Retail Price aia sanga hralh chu dan kalh a ni tiin, complaint/report a luh chuan dan bawhchhetute chu dan anga hrem theih a nih thu mipui an hrilh thin a. Hetiang bawk hian, Consumers Union lam pawhin MRP chungchangah hian thahnemngai takin mipui an zirtir thin bawk. Hetih lai hian, mipui lam hian MRP aia sanga thil an leiin, complaint/report mai lovin, thinrim hrikthlak nana social media lama tarlan a, phun lungawi mai hi kan kalphung a ni deuh ta a. Hetianga kan tih hian, dan bawhchhiatna hi a hluar phah a, a tuartu chu mipuite bawk kan ni thin.

Motor part leh electric bungrua hralh chungchangah, Legal Metrology lam chuan complaint/report an dawng nual tawh tih an sawi a ni.

Maximum retail price (MRP) inziak awmzia chu, ‘hei aia toa hralh loh tur’ tihna a ni mai a, MRP ang chiah chiaha hralh tur tihna pawh a ni kher lo. Thil siamchhuaktute hian, an thil siamchhuah man (price) an bituk hian, chhiah chawitur neuh neuh chhungkhung (inclusive) vekin, a zuar chhawngtuten hlep an neih ngei theihna turin MRP hi an siam thin. Entirnan: Damdawi pakhat chu a MRP Rs 20 lo ni ta se, a siam chhuahna atanga damdawi zuar Company hnena hralhna rate chu Rs 8 emaw a ni ang a, chu chu Distributor hnenah Rs 10 emawin an pe chhuak ang a, Distributor chuan stockist hnenah Rs 12 emawin an hralh ve leh ang a, Stockist te chuan dawr (retailer) hnenah Rs 14 emawin an pechhuak ve leh emaw a ni ang a. Retailer ten mipui hnenah Rs 16 emaw, hlep hnem an tum chuan MRP Rs 20/- emawin an lo hralh ve leh ang a. A ler bera lo hralh chhawngtuten MRP-a an hralh pawha hlep an la neih theihna turin a siamchhuaktute hian a man an bithliah vek thin a ni.

MRP aia tova thil hralh hi a hremna chu Rs 5000 thlenga inchawitir theihna a ni a, hetianga sawrkarin dan a siam nachhan pawh, mipuiin an dikna leh chanvo diktak an chan theihnan a ni. Hei hi mipui lam hian kan la varpawh lo hle a, thuneituten action an lak theih dan hre reng chunga complaint thehluh emaw, report thehluh emaw kan peih thin loh avangin, diklo taka thiltih hi a hluar chho mai niin a lang. Mipui lam hi fet peihin, taima ila, mipui kan tanrual thiam phawt chuan dik lo taka thiltih hi a kiam ngeiin a rinawm.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy