Daily Newspaper

Editorial…..

14

Mipui hriattur puanzar dan hi…

Sawrkar laipui chuan September ni 1 atanga hman tan tur Unlock 4.0 guidelines chu August ni 29, 2020 khan a tichhuak a. Sawrkar laipui inkaihhruaina kalh si lovin state sawrkar ten anmahni dinhmun mil turin state puala hman tur guidelines an lo siam ve leh thin a. Hemi chungchanga mipui hriattur pawimawh puanzar kawngah hian Mizoram sawrkar hi a vuaicha deuh thin niin a lang.

Sawrkar laipui lam hian thla a thar hma ni thum vel a la awmin guidelines thar hi a tichhuak tlangpui a; guidelines a tihchhuah hnuah state tan pawha guidelines thar duanna hun thawl awm tura tih niin a lang.

Inkaihhruaina thar tihchhuah kawngah hian, Mizoram sawrkar hian guidelines thar hi hman tan hun tura bithliah hma chiah zan lamah an tichhuak tlangpui a. Hei hi radio leh TV lam chuan a tuk zingkarah an puang hman awrh a, print media thenkhat chuan chanchinbu lamah an tichhuak hman meuh lo; a tichhuak thei awmchhunte pawhin, zan rei tak thleng sawrkar thu ngaihchan a ngaih avangin harsa tak chungin an tichhuak thei tawk chauh thin.

Sawrkar laipuiin guidelines a tihchhuah tawh hi chuan, mipui lam an phi chung tawh thin a; ‘keini hi engtinnge kan awm ve dawn, sawrkar laipuiin guidelines a tihchhuah hnuah hian kan va hre tlai thei bik thin ve’ tih hi an phunnawina a ni thin.

Guidelines thar duan kawngah hian, inhmakhua theihna hi a tam zawk a nih a rinawm a, chawp leh chilh lutuka hetianga mipui hriattur pawimawh puanzar a ni thin hi, sawrkar pawhin hma sawn tumin tan la thei se a duhawm ta hle a ni.

Sawrkarin mipui hriattur pawimawh a puanzar kawngah hian, tunhma chuan kalphung fel tak a awm thin a. Thu pawimawh bik puanzar tur a awmin, press conference neiin, press lamin rualkhai takin mipui an hrilh thin a. Tun hnuah hian, hetia social media a lo chak tak hnuah hian, press lam ngaih pawimawhna hi a tlahniam ta deuh niin a lang a. Zan lama social media-a sawrkar thu pawimawh thehdarh, a tuk lama chanchinbua lang hman si lo a awm hian, mipuiin thu belhchiandawl a ni em tiin an buai phah fo a, mipui harsatna thlentu a ni zawk thin.

Sawrkar chuan mipui hriattur thu pawimawh a puanzar dawnin, mipuiin innghahna bera an lo neih kumkhua thin chanchinbu, TV leh radio hi ngai pawimawh hmasa se, chu chu mipui pawhin innghahna tlakah ngaiin rilru ngaihngam takin an lo dawngsawng thei dawn a. Chanchinbu chhiar pha lo te, TV en hman lo leh radio ngaithla hman bawk si lo, mahse mahni hnathawhna hmuna mobile phone khawih thei si te tan, proper channel hmanga thu pawimawh puanzar tawh, social media lama ‘thehdarh’ zui zel hi chu, tih theih chuan a tha e.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy