Nimin khan School Education Minister Dr Vanlalthlana chuan MZP Rising Day leh kum 90 tlin lawmna kharna hun Berawtlang Multipurpose Hall-ah a hmanpui a; zirlaite chu Zoram hmabak an nih thu a sawi.
“Zirlaite hi Zoram hmabak an ni a, danglamna siamtu, thil thar hmuchhuaktu, ram hruaitu an la awm dawn, tuna awm mekte hi nakin lawkah kan ral zel dawn a, he ram hi kan inhlanchhawng zel a ni. Kan mi hmasaten an hun laiin an lo humhim tawh a, kan hun theuhah kan humhim a, thangtharte chenna tlaka kan siam zel a ngai,” tiin education minister hian a sawi.
MZP chu sorkar lo khalh ngil tawhtu a nih thu te, remna kan neih theih nan te, zofate inpumkhat nan te, ramri humhalh nan te, hnamdangte chimrala kan awm loh nan te, Mizo faten technical seat kan hum theih nan te an thawh hlawk hle a, hma lam hunah pawh tha thawh zela theih tawp chhuah zel a ngai a ni, a ti bawk.
MZP President Dr C.Lalremruata pawhin thu sawiin, a theih chin chinah MZP chuan sawrkar thlawpin a thawhpui dawn a, chutih rualin an dik lohna leh fel lohnaah erawh an dodal zel dawn tih a sawi a. Zirlai pawl inthlanah political party te inrawlh lo se, a duh thu a sawi bawk. Zirlaite chu pass ringawt ni lo, chhawr tham thiamna nei tur leh fa hrin manhla ni turin a fuih bawk a ni.
MZP hi kum 1935-a din a ni a, kum 90 tlin lawmna nikum atanga neih chu nimin khan a hmawr bawk a ni. MZP hian programme pawimawh tak tak a hmang thin a, HSLC Top 10-a Mizo tling chawimawi te, Zofest, Zirlaite Ni, Zoram Ni, Inter High School Quiz Competition, Hnamdang nupui/pasal nei lo tura inzirtirna te leh Remna Ni te an hmang thin a ni.
Edn minister Mathana’n MZP Rising Day a hmanpui “Zirlaite hi Zoram hmabak an ni”
