Education department-a hna inpek dan duh loin hna inpekna copy hal

Education department-a hna inpek
dan duh loin hna inpekna copy hal
Education department-a Samagra hnuaiah tender ni lo, restricted pawh ni pha lo, departmental works-in a duhsak zawng hna inpek a awm tih Congress Thalai chuan an sawi a. An thil tih duh lohna lantirin he hna inpekna document hrang hrang copy chu Zirtawpni khan Congress Bhavan kawtah an hal.
Congress Thalai Hqrs vice president R Lalhmingmawia chuan, Education minister Dr Vanlalthlana’n Education department-a Samagra hnuaiah tender ni lo, restricted pawh ni pha lo, departmental works-in a duhsak zawng leh ZPM worker-te hna a pe nasa hle niin a sawi a. Kum hnih awrh minister a nih chhung, 2024 January 1 atanga 2026 Febuary 28 chhung khan Samagra hnuaiah ringawt hna hrang hrang belhkhawm Rs 5018,38,484 man a pe tawh niin a sawi.
“Chumai niloin, Samagra Financial Rules-in cheng nuai 25 chunglam chu open tender-a hna pek tur tih a sawi laiin, firm pakhat – TiLi, ZPM hruaitu pawimawh tak laina hnai tak ta chu tender chhuah lo, departmental work pawh niloin cheng nuai 59 man a pe a. TiLi firm leh Samagra agreement-ah Education minister hian a sign ve nghe nghe. Eng department-ah mah contractor-te work order emaw, contractor leh department-te agreement-ah anmahni duhsaka hna petu minister-in an sign ngai lo,” a ti.
MLA inthlan hma khan ZPM party chuan candidate-te kokhawmin, Pathian hnenah tawngtaina nen Zoram mipui hmaah thu an tiam a. ‘Chhung leh khat, party mite duhsak bikna lakah ka inthiarfihlim ang’ an ti nia sawiin, an intiamna mipuiin an ring a, rorelna ZPM party kutah an pe tih a sawi a ni.
ZPM-in sawrkarna a chan hnuah, mahni party mite leh duhsak zawng hna pekna atan restricted tender a tam ta lutuk a, approval pek a buaithlak tham hial tih R Lalhmingmawia hian a sawi a. “Mizorama kan la hriat ngai loh, restricted tender ‘blanket approval’ an rawn ching chhuak a. Restricted tender kan ti ve loang, tia intiam sawrkar an ni,” a ti.
Chu mai ni loin, restricted tender pawh ni pha lo, ‘departmental work’ an uar em em tih pawh sawiin, work supervisor atan an mi duhsakte hmangin, sawrkar kal tawhte aia nasa in departmental work-in Education department Samagra hnuaiah an inpe mek tih a sawi.
“ZPM sawrkar hian Pathian leh mipui hmaa anmahni thutiam zah loa, sawrkar hmasate aia kalphung tha lo min hmuhtir hi Congress Thalai chuan tha lo kan ti a. Samagra hnuaia departmental works-a hna pek, name of work, estimate amount, work order copy hi kan hal a ni,” Congress Thalai hruaitu hian a ti bawk.