Education minister-in dan a palzut – Congress Thalai

Samagra-a hna inpek danah Education minister-in dan a palzut ngei tih Congress Thalai chuan an sawi.
Congress Thalai Hqrs. thuchhuak chuan, Samagra Financial Rules-in chhan leh vang tha tak a awm a nih chuan restricted tender phal chin a nei a. Chutihlaiin cheng nuai 30 chunglam chu open tender tur a ni, tiin, open tender dan tur pawh siamfel vek a ni tih a sawi.
‘TiLi firm, a neitu ZPM hotu lawk tak chhungkhat hnai tak chu open tender chu sawi loh, restricted tender pawh ni pha lo, expression of interest pawh siam loin Education minister hian cheng nuai 59 man chu thenawm chawhmeh suahin work order engmah siam loin TiLi Firm leh Samagra hian agreement an ziak tawp a. Work order emaw contractor/firm sawrkar department nen agreement an ziahah, tu minister mahin an sign ngai loh laiin, he agreement-ah hian Education minister hian a hming a sign hi dan palzutna dik takah kan ngai,’ a ti.
Hetiang hi department dangah chuan estimate amount atanga 5%, 10% a nih tlangpui thin laiin, TiLi leh Samagra-in agreement an ziah dan chuan, estimate amount nuai 59 atanga 40%, nuai 23.6 chu engmah hnathawh awm hmain Samagra-in TiLi Firm hnenah mobilisation advance atan a pe tawp tihna a ni tih a sawi.
;Hetiang khawpa mawi leh mawi lo pawh ngaihtuah loa uchuak taka induhsakna ZPM party-a nihna pawimawh tak chhungkhat hnai tender loa hna pek hi ‘dawt’ a ni lo tih Zoram mipuiin an hriat hi Congress Thalai chuan a duh a ni,’ thuchhuah chuan a ti.
Opposition an nih laia restricted tender ti ve lo tur leh, nasa taka restricted tender sawisel a, departmental works sawisel nasa em em thintuten, ‘MNF leh Congress pawhin an lo ti a, kan ti ve mai a ni’ tiin Education minister hian departmental works hna pek a sawimawi ta mai tih sawiin, mahni thutiama an din loh zia a puangah an ngai tih a sawi.