Education officer leh zirtirtuten
office hna leh a kalphung an zir
School Education department bultumin a hnuaia thawk mi 100 chuan Thawhlehni khan Administrative Training Institute-ah ni li awh tur ‘office administration’ an zir tan.
Training hmanpuitu School Education minister Dr Vanlalthlana chuan an department hnuaia thawktu officer/ zirtirtuten office kalhmang leh sawrkar inrelbawlna bakah sawrkar hnathawk an nih anga an hriat tur hrang hrang an hriat theihnan hei hi buatsaih a ni tih a sawi a. Department chhunga inrelbawlna tha zawk leh felfai zawk a awm theihnan zirtirtute pawhin zirtir hna bakah office kalphung, an tih tur leh tih loh tur, dan leh hrai chi hrang hrang hriat a tul a, budget, office administration leh e-Office thlenga hre turin IT lamah pawh tan lak a, hriat vek a tul tawh tih a sawi.
“Tunah hian Mizoram Secretariat-ah chuan e-filing system vek a ni tawh a, hei hi nakin lawkah department a la rawn thleng dawn a, transfer & posting pawh digital veka tih a nih tawh dawn avangin heng process thleng hian kan hriat a la tul dawn a ni,” a ti.
Zirtirtuten RTE Act an hriatchian a tul a, RTI Act 2005 an hriatchian a, zawhna chhan leh anmahni dawrtute lo dawr danah pawh tan lak a, mawi taka lo chhawn thin turin minister hian a chah bawk.
Education officer leh zirtirtuten office hna leh a kalphung an zir
