Mizorama sawrkar sikul kalphung siam tha turin ‘Mizoram Education Reforms Committee’ din a ni a, committee hian elementary school bakah higher education a huam tel dawn tih education minister chuan a sawi a. Sawrkar kaltain kum 2023 chhunga sikul 180 chuang dinhmun sang zawka a hlankai zingah dan dik tak zawm loa hlankai an awm tel tih sawiin education minister chuan sawrkarin uluk taka a zirchian hnuah DP&AR leh Finance-in an pawmpuite chu dinhmun sang zawka an hlankai chauh tur thu a sawi bawk.
‘Dan dik tak zawm lova dinhmun sang zawka hlankai school’ te an lo awm a, ‘reform’ chu kan mamawh hle niin a lang. Education department hnuaia inrelbawlna hrang hrang hi siam that ngai a tam dawn hle niin a lang a. Inrelbawlna dikhlel thlengin hma a ngai dawn a nih chuan, education siam thatna tur kawng a thui dawn hle a, committee thuneihnain a phak vak loh thlenga hma tel te pawh a ngai thuak thuakin a rinawm.
Congress sawrkar lai khan Education Reforms Commission kha din niin Reports pawh 2010 khan sawrkarah thehluh a ni a. Khatih laia chief minister khan India rama ERC din thei state tlemte zinga Mizoram a tel thu chhuang takin a sawi thin a, mahse ERC report anga kalpui thei tur chuan cheng vaibelchhe zahnih chuang sen a ngaih tur thu khan a tlip thin. ERC Report anga kalpui kha a ni leh ta chiah lo a. A hnuah CCE kalpui a han nih khan, ERC report nena inzul thenkhat kha chu ERC report bawhzuina anga sawi te pawh a ni nual ta awm e.
Tuna ERC hian question pattern thlenga hma a tum a nih chuan teaching methods kan kalpui mek ‘boring’ tak mai pawh hi hma tel thei se a duhawm hle ang. Zirlaiten class period tin mai nghakhlel taka an lo hmachhawn theih hi a pawimawh a, classroom environment a zalen loh chuan zirlaite hian an zirlaiah rilru an pe tak tak thei lo. English medium kan ti a, zirlai chhungril hrefiah tak tak si lova by heart hmanga kan innawr avangin, mark sang tak an hmuh thinna kha a kum leh lawkah chuan a bul atanga byheart a ngai leh mai thin. ERC hian hengte pawh hi hma tel thei se a duhawm hle ang.
Education Reforms Committee
