Site icon The Aizawl Post

Education Reforms

Assembly Session kal mek nimina zawhna leh chhanna hunah school education chungchanga zawhna lut, ‘sawrkar sikula kalte uniform inang vek haktir tumna a awm em’ tih zawhna chuan thil dang a kangkai chho zel a, NABARD sum puk hmanga zirna in thawmthat hna thawh dan dik lo a awm tih chungchangah inhnialna a chhuak leh a, a tawpah phei chuan House member thahnem tak ding chhuakin thusawi an inchuh luai luai a, Speaker pawhin thelh lawk thei lovin member-te a inhrikthlak tir a, a tawpah a bengdai thei hram.

Assembly Session neih apiangin education kaihhnawih hi khel hlawh zinga pakhat a ni thin. Hei hian a entir chu, mipui aiawha rorelna in sang bera thute hian school education hi an vei tlangin thahnem pawh an ngai tlang a, hriat lah an hre tlang, tih hi a ni. Zirna quality a ni emaw, zirtirtu indaihlohna a ni emaw, institution building sak chungchang a ni emaw, han rikpui deuh laih ngai hi a awm thin.

Tun tuma school uniform chungchang zawhnain zawh belhna a hrin chhuah zingah hian, NABARD sum puk hmanga school building sak that hnaa thil dikhlel awm chungchang sawi chhuah a ni a.
Mizoram sawrkar chuan NABARD sum cheng nuai 3500 pukin sikul 172 sak that hna a thawk a. Hemi chungchangah hian nikum February thla khan MZP lam chuan thil dik lo tam tak a awm thu an lo puangzar tawh a; a nih tur ang ni lo mai ni lovin, a hna hrim hrim thawh mumal loh leh chhe tak tak hmuh tur a awm nual, MZP chuan an ti a ni.
Kha thil kal zel khan House chhungah thawm a rawn nei chho leh a, nimina zawhna chhangtu school education minister a din lai hian, Opposition member engemawzat chu dingin, House chhunga inhnial vak lovin, endiktu committee din ni se tih te an rawt hlawm a ni.

Mizoram hian Education Reforms hi kan mamawh tih hriain kum 15 vel kaltaah khan Congress sawrkar chuan Education Reforms Commission a din a. Khatih laia chief minister Pu Lal Thanhawla pawh khan chhuang takin a sawi chhuak fo a, India rama education reforms commission din thei state tlemte zingah kan tel thu te, commission report a lo chhuah hnuah, implement tur chuan cheng vaibelchhe zahnih vel sen belh a ngaih dawn avangin sum harsatna avanga implement mai theih a nih loh thu te pawh a sawi thin. Chuti chung chuan ERC Report 2010 dungzuia Group of Experts ten recommend an siam angin school education system hi engemawzat chu tihdanglam niin national pattern angin kan kal chhoh theih phah a tih theih awm e.

Quality education tak ai hi chuan educational infrastructure lam hian ngaih pawimawh hi a hlawh deuh thin niin a lang a; infrastructure hi a pawimawh tho rual hian, quality education kan neih theihna tur lam hian sawi a hlawh lo deuh em a tih theih a. ‘Quality education’ kan neih theihna tur lam hawi hian kan House member-te hi hmai senin House chhungah hian han inhnial thin se, mipui tan chuan a thlamuanthlak lehzual ang. Formal education ngawr ngawr lo deuh, tuna school thenkhata vocational course atanga zir chhuakte hi, vocational school ngei atanga zir chhuak ni thei se, ‘self employment generation’ lam a chak ang a, thalai hnathawh tur nei lo, an thiamna haichhuahna tur nei mumal si lote tan vocational school-te hi a tha hle dawn a. Hetiang vocational school te hi district tinah hian pakhat theuh tal neih tumin tan lak ni se, chutiang atan chuan sum te pawh puk mai tur; investment tangkai tak a ni dawn si a, leibatna chhan tling leh thatpui tur a ni ngei ang.

Exit mobile version