David Zochhuanmawia
(Vida Hrahsel Saza)
Dr. HTC Lalrinchhana hi ka pa ngaihsan tak a ni a, inhmelhriatna leh inkawmna erawh kan la nei lem lo. Dikna leh Rinawmna vawng tlattu a nihna hian mipui ngaihsan rawn a hlawh phah a, kei pawhin ka ngaihsan chhan ber a ni. Mahse, mi dik lote tan erawh a huatthlala fû mai thei e. A pa hming hi Hrinzama a ni a; a nupui erawh Malsawmdawngliani a ni. Dr. HTC Lalrinchhana hi Zawlsei (Champhai District) khaw chhuak a ni a. February 15, 2006 khan Judicial Service-ah a inziak tling a. Thiamna lamah M.A., LL.B., Ph.D. a ni a. An chhungkua leh a mimal lam nun erawh han chhuizui vak ka tum lo. November 1, 2022 khan tuna a hna chelh mek “Special Judge, Prevention of Corruption Act, Aizawl” hna hi a thawk tan a ni.
Dr. HTC Lalrinchhana hian Mizoram Judicial Service hna hrang hrang a lo chelh tawh a. Civil Judge-cum-Judicial Magistrate 1st Class Kolasib, Magistrate ASDCC Kolasib, District Registrar Kolasib, Member Secretary DLSA Kolasib, Certificate Officer Kolasib, Sr. Civil Judge-cum-JMFC 1st Class Aizawl, Chief Judicial Magistrate-cum-Sr. Civil Judge Lawngtlai, Chief Judicial Magistrate-cum-Sr. Civil Judge Saiha, Secretary District Legal Services Authority Saiha, Principle Magistrate Juvenile Justice Board Saiha, Chief Judicial Magistrate-cum-Sr. Civil Judge Lunglei (21.01.2016 – 04.08.2016), Judge Fastrack Court Siaha (04.08.2016 – 29.03.2019), Additional charge of Addl. District & Session Judge Lunglei (08.02.2018 – 29.03.2019), Addl. District & Session Judge Aizawl (29.03.2019 – 08.04.2022), Additional charge of Judge Special Court ND&PS Act Aizawl (12.11.2021 – 08.04.2022), Judge Special Court ND&PS Act Aizawl (08.04.2022 – 31.10.2022) te an ni a. Thil hrang hrangah experience a ngahin, a rorel dan hi a lâi thin hlein a lang.
Mi dik lo hum tum hauh loa an phu tawk hremna pe thin a nihzia hmuh theihin a lang a. Hetiang Judge huaisen hi kan la ngah lo hle mai. Mihring inchhungkhat kual, inhmaizah tawn them them, dân (law) a nihna anga a huna hmang thei lo fo thin hnam hi kan inchhui chian tak tak chuan Jail bang zût tur an lo kat nuk si a. Tute sorkar laia eiru nge? Man tang ei engzat nge awm tih lam erawh ka sawi tum a ni chiah lo. Mahse, an chhui loh avanga Eiruk thubuai (Corruption) case nei lo, chhui zui zel se Jail bang zût tur hi engzah tak la awm ang i maw? Kohhran lama thawh tam thei thei kan chawimawi a, nihna tha tha ka’n pe leh ngawt thin a. Chhui zui a awm thin loh vang a ni. Mihring a hlawh phu loa khawsa leh in nei lian te hi umzui zel ila, tu nge himin him lo ang. Sorkar hnathawk tan hausak a har a, rethei leh nghei erawh chuan an awm lo thung.
Dr. HTC Lalrinchhana hi tan lam nei lo, Judge tha a nihzia ka ngaihtuah chhuah apianga ka rilrua lang tel thin a awm a, chu chu kum 2013 – 2018 inkara Finance Minister Pu Lalsawta kha a ni. Pu Lalsawta khan kum 2018 MLA General Election dawn khan a Campaign ve na tura a pawisa neih zawng zawng kha chêng Nuai 6 vel chauh a ni, an ti a. Minister term 1 (Kum 5) chhunga a thawh hlawh a khawl ve rek rek atan chuan a tlem lua a ni. Ka sawi chak chhan ber erawh a Eiru (Corrupt) lo a, mantang lak a nei ngai lo tih a lang chiang hlein a hriat. Dikna leh Takna; Rinawmna neitu leh Pathian tih mite pahnih chanchin hian beng ti tlai se; hei hi a ni Chanchintha mi tin hriata hlu chu! Kan Pathian thu hriat tam tak famkimna chu zawm hi a ni mai! A bak dang teh vak a awm lo e.
Dr. HTC Lalrinchhana anga Judge huaisen hi engtikah nge kan neih leh ang? Tu nge a hnung zui ngam ang? Dân hmaa inlan mamawh te’n Court-a dinpui turin Ukil an ruai thin a. An niin an Client-te tana dingin an thu hriatte Judge hmaah an sawi thin a. tan lam nei hauh loa ngaithlatu beng leh an documents neih hrang hrang atangin Judge-in thutlukna a siam thin a ni. Tun hnaia Eirukna (Corruption) laka fihlim lo mi engemaw zat Jail-ah a thawn liam a, Bail theih loh dânte pawh dân ang taka siamin an phu tawk hremna a pe thin a nih hi! Hetiang taka pa huaisen leh dikna duh hi hna hrang hrang thawk leh chanvo hrang hrang chelh mektute hian entawn ila; a mamawh tur bera lang Politician-te hian entawn ila, indik siak ila, kan ram siam tha tak tak tur hian theihtawp chhuah zel ang u. Dr. HTC Lalrinchhana hi Pathianin ti chak se, mi dik lo hrem ngam khawpa a huaisen avanga amah tih nat tum tam tak lakah Pathianin veng tlat bawk rawh se.