National Rural Health Mission mission director hlui, Mizoram Health Services director hlui ni bawk Dr N Pallai chu eiruk thubuaiah court-in kum khat lung in tang tur leh sumfai cheng nuai 24 chawi turin a ti.
The Aizawl Post-a tarlan tawh angin, PRISM-in a laka Anti Corruption Bureau (ACB) hnena thubuai an thehluh chhuina kal zelah Dr N Pallai hi sawrkar hna a thawh laia a sum tihchingpen nia sawi chhuichian a ni a. October 2009 khan a tak huaihawt si loin tum li workshop nei anga insawiin Rs. 4,19,360 eirua puh a ni.
Kum 2008 khan registered contractor pawh ni lo, Hunliannghaka, Baktawng hmingin Health Sub-Centre 10 thawmthatna tur hna pechhuakin a vaiin Rs. 35,40,000 man a ni. He hnathawhna bill hi Hunliannghaka hmingin cheque-a pekchhuah a ni na a, Mizoram Rural Bank Dinthar Branch-a Dr N Palaia bank account kaltlanga lakchhuah a ni thung. Melriat Sub-Centre, Keitum Sub-Centre leh Dampui Sub-Centre ah te a bikin an hnathawh leh sum sen a inmil lo hle tih hmuhchhuah a ni. A lo berah Rs. 11,85,533 hleprua hmuh a ni.
Kum 2007 khan Lalrinliana, Republic Veng Aizawl hmingin primary health centre (PHC) 19 thawmthatna tur work order pekchhuah a ni a, damdawi in pakhat tan Rs. 50000 zel hisap a ni. Bill lem hmangin cheng nuai 9.5 lakchhuah a ni a, he sum hi a hmanna tura hman a nih loh bakah Dr N Pallai hnena hlan niin, Lalrinliana hian a hminga hna chhuak hi a lo hre lo hrim hrim a. PHC 15 hi thawmthat an ni lo tih hmuhchhuah a ni bawk.
August 2007 leh October 2007 chhung khan PHC 36 rawng hnawih thatna tur PHC pakhat tan Rs. 50000 zel hisapin bill lem siam a ni a, heta PHC 24 hi a taka rawng hnawih that ni lo, hemi atana ruahman sumpai hi eiruk nia hmuh a ni.
Heng puhna hrang hrangah hian court chuan Dr N Pallai hi Prevention of Corruption Act 1988 hnuaiah thiam loh a chantir a, a kut atanga ACB sum man Rs. 419360 pawh sawrkar sumbawma lut tura chhuhsak (forfeit) a ni tih a sawi.
Special Court (PC Act) judge chuan August 14 khan hremna tur a puang a. A thubuai awrh hrang hrangte lakhawmin kum khat lung in tang tur leh cheng nuai 24 chawi turin a ti a. A sum chawi tur hi a pe thei lo a nih chuan kum 12 tan belh turin a ti a ni.
Tun tuma court-in thiam loh a chantir tak Dr N Pallai hi kumin May 15 khan eiruk thubuaiah tho court-in thiam loh a lo chantir tawh a. He thubuai bikah hian lung ina kum 4 tang tur leh cheng nuai 24 chawi turin a chungthu a rel a ni.
Eiruk thubuaia thiam loh chantir hremna tichhuak
