Eirukna chhui hnuah Portuguese PM bâng

Portuguese Prime Minister Antonio Costa chu investigator ten a official residence eirukna thil kaihhnawiha an dap thut hnuah a bang.
Rinhlelh a nih loh thu sawiin mahse a lakah chhuichianna kalpui mek a nih laia office a luah chu a inrem thei lo tiin a sawi.
Prosecutors te chuan lithium mines leh hydrogen production kaihhnawiha thil fel lo an chhui chian mek thu an sawi a.
Mi panga thuzawhfiah tura tih an nih thu sawiin chung zingah chuan Costa a chief of staff, Vitor Escaria pawh a tel an ti bawk a. Escaria hi man a ni tawh bawk a.
Infrastructure Minister Joao Galamba chu energy deals chhui chianah hian an huam tir bawk.
“Prime Minister dinhmun chelh hi criminal act thila rinhlelh a nih mek laia chelh chi niin ka ngai lo,” tiin prime minister chuan a sawi a.
Costa chuan amah corruption investigation a telh a ni chu mak a tih thu sawiin mahse theihtawpin a thawhpui tur thu a sawi thung a.
“Engmah thil fel lo leh dik lo a awm lo va, engmah zep emaw thup tur ka nei lo,” tiin a sawi bawk.
President Marcelo Rebelo de Sousa chuan prime minister banna chu a pawm thu sawiin political party te chu thurawn la turin a kohkhawm tur thu a sawi bawk.
Eirukna kaihhnawih thilah thuneitute chuan hmun hrang hrang 40 vel an chhui chiang mek a. Northern Portugal a lithium mining concession inpek leh hydrogen production project, Lisbon chhim lam kalpuiah thil fel lo a awm nia ngaihte chhui chian mekin a awm a ni.
European Union chuan China, Africa leh South America mines atanga lithium tharchhuah leh raw material dang dangtea innghah ngai renga awm chu kalsan tumin chet a la nasa hle.
Portugal lithium reserve hi Europe innghahna anga ngaih niin heng lithium te hi electric car te tana pawimawh em em a ni.