Eirukna lakah tun thlengin kan la fihlim niin kan hria – Lalthansanga

Eirukna leh hlemhletna lakah tun thlengin an la fihlim nia an hriat thu minister F Lalthansanga chuan a sawi.
Dampa bial by election atana an campaign-naah minister Lalthansanga chuan, ZPM chu an danglam bik a, chu an danglamna chu ram hawpkhawp kan thar theih tawh lohna rama hawpkhawp kan thar leh theihnan leh he ram dinthar lehna atana fatu an ni tih a sawi.
“Ram rawngbawltu kan ni a, eirukna leh hlemhletna lakah pawh tun thlengin kan hotute an la fihlim niin kan hria. Kan huang chhung kan zauh tur a ni a, mitin an leng tur a ni. Kalphung thar aupuitu kan ni a, kan auhla ang ngeiin sawrkar hna lakah, sawrkara hamthatna awm thlan chungchangah pawh a tling leh tha leh a phu ngawih ngawih chauh kan la in kan thlang a, party induhsakna leh chhungkhat leh unau induhsakna kan ti ngai lo,” a ti.
Sawrkar tum ber pakhat chu, eizawnna ngelnghet nei tura hma lak a ni tih Lalthansanga hian a sawi a. Tuna kan lo neih dan, kumtina ram thar zuana lo vah chu zawimuanga tih bo an tum a ni, tiin, “Politics thliin a chhemkual vel mai maiin kan awm tur a ni loa, kan rinawm tur a ni. Kawng chi hrang hranga hmasawnna kan thawhna kawngah pawh belhchian kan dawl tur a ni a. Chu chu kan ramin min phut a ni a, kan sakhuana pawhin a duh dan leh min zirtir dan a ni,” a ti.
Minister F Rodingliana chuan inthlan an hmachhawn turah mipuiin rilru fim an put a pawimawh tih a sawi a. Sum leh pai leh therhlo uma rinawmna hralh lo turin an inchah tih a sawi.
“Inthlang ram kan ni a, inthlan buatsaihnan hian sum leh pai engemawzat sen a ngai thin a, mipui leh candidate-ten rilru dik kan put chuan sum leh pai sen tur tam tak kan tihniam thei a ni,” a ti. Hmasawnna chak zawka thawh a nih theihnan sawrkar nena ke pen thei tur, mi dik ZPM candidate thlangtling turin Dampa bial mipui a ngen tih a sawi a ni.
ZPM official candidate Vanlalsailova chuan, an bialtu MLA in hun lo taka a boralsan chu an tuar em em a, a hmunruak a zau dawn a; inthlang ram kan nih angin an hotuten duhsak takin ding turin an dah leh a, bialmite khawngaihna a dil tih a sawi. “Dampa bial hian hmasawnna hnathawh tur hmachhawp kan ngah hle a, sawrkar lai tha chakna ringin kan bialin hma chak taka a sawn theihnan kan zavaiin tangrual ila, thu belhchian dawl lo leh dawt hmanga inbei loin, thianghlim taka he inthlan hi hmachhawn turin kan inngen a ni,” a ti.