Eirukna lam rawngkaia inhnam-
hnawih lo turin surveyor-te chah
Mi chan ai lak leh ram tehnaa tlak zeh ve ang chia tel ve tum lo turin Revenue minister B Lalchhanzova chuan surveyor tharte a chah a. Heti lama harhvang deuh an senior-te hnung zui lo ngam turin a chah bawk.
Land Revenue & Settlement department-in surveyor 14 a lak thar chu Zirtawpni khan a changtu minister hian a kawm a. Department tawp, eiruk leh hlemhlet tamna leh thawktute pawh dawr harsa tak anga hriat an ni thin chu thlak tumin, hotu lian ber atanga district office zawng zawngah tan la in an insiamtha mek tih a sawi.
“Mipuiin min thlir dan tam zawk chu mipui nena indawr hnai ber surveyor-te kutah he department hi a awm a. Kan insiamthat kawngah hian a hmahruaitu ni turin surveyor tharte kan beisei che u a, in lakah kan thikthu pawh a chhe hle dawn a ni,” tiin hnuhma tha hnutchhiah turin a chah.
Sawrkar hna tha tak an neih chu thil danga thleng phal lo turin a chah a. Mi chan ai chuh, compensation lakna tura rinawm lo taka thil tih, ram tehnaa lo tlak zeh ve phet, sawrkara ram surrender tur ram tehnaa a neitute nena lo insiamrem puia report diklo pek leh, eirukna lam rawngkai reng renga inhnamhnawih lo turin surveyor tharte hi a chah a. Helam kawnga senior harhvang deuh an lo tawng palh a nih pawhin, an hnung zui lo ngam turin a chah.
Revenue department-in inthenfai hna an thawh mekah diklo taka thiltite laka evidence tha tawk tak a awm chuan an dim dawn lo tih B Lalchhanzova hian sawiin, complaint dan tur dik taka complaint awm chu an bawhzui zel tih a sawi a ni.
Surveyor indaihlohna hriain chief minister-in mi thar 14 lakna tur a phalsak chu lawmawm a tih thu minister hian a sawi a. Recruitment Rules chungchanga court kal an awm avanga surveyor tling tharte appointment an pek mai theih loh dan leh chu buaina chinfel a nih ruala district hrang hranga post tura surveyor-ten training an zo thei chu lawmawm a tih thu a sawi. Surveyor dang 30 lakna tur exam zawh fel a ni leh tawh tih a sawi bawk.
Eirukna lam rawngkaia inhnam- hnawih lo turin surveyor-te chah
