ZPM a sawrkar chuan anmahni zingah eiru awm lo turin an inhrilh lawk a, an lo awm a nih pawhin an insiksawi hreh dawn lo tih ZPM leader Lalduhoma chuan a sawi.
Champhai district East Tuipui bial khaw hrang hrang a fannaa vantlang inkhawmah ZPM leader chuan, corruption-in kan thinlung mai niloin kan ram leilung leh nungcha a tichhe mek a. An sawrkar veleha an do tur hmasa ber chu corruption a ni, tiin a sawi.
Sawrkarna chelh atanga ni 100 chhungin corruption tih rehnaa hmalak tul zual tih hman an tum tih sawiin, “Kan candidate zawng zawng hi ‘ka eiru ve dawn lo’ tia thutiam turin kan chah mawlh mawlh a. Thildangah pawl dang kan phak lo maithei, amaherawhchu kan mite hi eiru ve lo turin kan infuih nasat avang hian an ti ngam lo turah kan ngai a, an lo ti a nih pawhin kan siksawi hreh dawn lo,” a ti.
ZPM-a sawrkar chuan tar pension Rs. 1000 in an ti pung dawn, tia an lo sawi chu hna hmasaah an telh dawn a. Thlai zawng zawng an lei sen dawn loh avangin an lei hmasak tur chu sawhthing, hmarcha, aieng, hmunphiah a ni tih Lalduhoma hian a sawi. Kumpui lingleta rim taka hna an thawh thin a lo hlawk theihna’n ruahmanna an siam tih a sawi.
“Kan ramah hian ram awl hman tangkai loh a la tam em em a, mirethei kan la tam em em bawk. Tuna kan thlai thar lei tur pawh hi short term a ni a, long term project hi heng mi harsa zawkte hian kan nghak hman lo. Kan ram leilung a tichhia ang, ti zawngin an sawi thin a, amaherawhchu a hlawkna kan tel tur nena ngaihtuah chuan kan hlawk kan la ti tho. Mumal takin contract farming leh vegetable supply chain kan ti dawn bawk a, kan duh duh thlai ching mai loin a rate awmsa leh hresa in thlai chin tur kan thlang dawn a, kumtina lo vat tawh loin eizawnna ngelnghet kan neih theihna turin hma kan la chho dawn a ni,” a ti.
Eirute kan siksawi hreh dawn lo – Lalduhoma
