Daily Newspaper

Electoral College in Biden chak zawk ti

9

Joe Biden chuan US president thlanna neihah US electoral college in chak zawka an puan tak hnuah ‘mipui duhthlan a dingchang’ tiin a sawi.

US democracy chu ‘nawr, enchhin leh vau’ tia sawiin ‘fan thei, dik leh chak’ tiin a sawi bawk.

President Donald Trump-an inthlan result thlak danglam tuma chet a lak dan chu sawisel bawkin ‘phek thar kai a hun tawh’ tiin a sawi bawk a. Electoral College in Biden chak zawka an puanna hi Biden-an office a luah theih nana tihmakmawh a ni.

US system-ah chuan oters ten ‘electors’ turte thlangin vote an thlak a, heng elector an thlanchhuah te hian inthlan zawh hnuah vote an tlak veleh thin a ni. Democrat Joe Biden chuan November thlaa inthlanah khan electoral college vote 306 hmuin Republican Donald Trump chuan 232 a hmu thung a ni.

President Trump chuan inthlan result pawm tumna emaw pawh sawi lan a la nei hauh lo thung a. Twitter kaltlangin Attorney General William Barr, US inthlanah vote tihchingpen a awm lo tituin a hna a chawlhsan tur thu a tweet thung.

Biden thung chuan Delaware atanga thusawina a neihah “America-ah chuan politician ten thuneihna an la ngai lo. Mipui ten thuneihna an pe thin a. Democracy meichher chu he ramah hian tunhmaa chhit tawh a ni” tia sawiin, “pandemic emaw thuneihna hman sual emaw pawhin chu meichher chu a timit thei lo” tiin a sawi bawk a.

Biden chuan ‘phek thar kai a, kan history a kan lo paltlang tawh thin angin insuihkhawm a, inthawidam hun a ni’ tiin a sawi bawk a. “American tinte president ka ni ang” tiin a sawi bawk.

Pandemic avanga US-a nunna chan tam chungchangah, “Pandemic leng thlasik thim takah hian inngainat leh hmangaihte in bula awm ve lovin holiday leh new year inhmang dawn a ni a, he ram hian heng harsatna te hi a paltlang leh ang” tiin a sawi bawl a. A thusawi tihtawp nan Biden chuan St Francis of Assisi tawngtaina a chham tel a ni.

Kumin hian US president inthlan dang ang lo takin electoral college ten ngaihven an hlawh chungchuang hle a. Hei hi Trump-a chetlakna vang niin state tina electoral college tena an vote thlak chuan ngaihven a hlawh hle.

Democrat California te electors 55 te chu vote thlak hnuhnung niin Biden vote vekin president ni tura a mamawh 270 vote chu an khumpui zui ta a ni.

Electoral College tena vote an thlak hma hian Michigan leh Georgia angah te chuan venhimna khauh taka kalpui a ni a. Michigan hi swing state niin Biden-an chakna a channa tho a ni.

Biden chuan inthlan zawh hnua official-te vauna nasa tak awm chu pawm theih loh tia sawiin ‘Hetiang hi kan tawn leh tawh ngai loh ka beisei’ tiin a sawi bawk.

Hei bakah hian kum 2016-a Trump-an chakna a chana electoral college vote a hmuh ang zah a hmuh thu sawiin hei bakah hian Biden chuan popular vote-ah chakna a chan thu a sawi bawk a, kum li kalta khan Trump chuan popular vote-ah chakna a chang pha lo thung.

Republican Senator Lamar Alexander chuan, “President inthlan a tawp ta. State ten an vote an tichiang ta a, court-in thubuai a chingfel bawk a, elector ten vote an thlak tawh bawk a. President Trump hian ram dah pawimawh hmasa berin president-elect Biden-an bul a tan that theih nan a puih ka beisei” tiin a sawi.

Tuna electoral college vote-te hi Washington DC-ah thawn a ni ang a, January ni 6-ah Congress joint session Vice-President Mike Pence kaihhruai chuan chhiarna official-in an nei ang a. Chu chuan 20 January a Joe Biden president atana lakluhna kawng a sial dawn ta a ni.

President Trump chuan thla kalta khan electoral college in Biden chu chak zawka an puan chuan January thlaah White House a chhuahsan tur thu a lo sawi tawh bawk a. Mahse, tichung chuan inthlanah thil fel lo a awm thu a la sawi reng tho bawk a, chak lo zawk a nihna a la pawm lo zel bawk.

Electoral College ten January ni 6-a official-a vote chhiara tihfel a nih hunah chuan President Trump chuan White House chhuahsan turin a inhmakhua a ngai tawh dawn a ni. US President-elect Joe Biden chu tih thin dan pangngaiin January 20-ah Capital Hill-ah US President atana lakluh inkhawm neiha lakluh a ni dawn a ni. Biden hian a duh ang thawhpui a neih theih nan zalenna zau tak pek a ni tawh thung.

Read More>> Full>> Epaper Subscribe Now

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy