Central-a BJP kaihhruai sawrkarin dan dikloa electoral roll atanga a paihten India danpui hnuaia vote an thlak theihna dikna chanvo an neih an hmuh let theihna atan Congress party chuan an pui dawn tih All India Congress Committee hruaitu Pawan Godara chuan a sawi.
Mizoram hmui tura AICC-in a dah Pawan Godara hian Aizawla thuthar thehdarhtute a kawmnaah, Indian National Congress (INC) chuan electoral roll-a thil tih dik loh awm, dan ang thlapa roll-a awm theite hming paihten an chanvo hmu leta roll-a an awm leh theihna atan leh, inthlan kalpui dan langtlang a awm theihnan, paih ho leh lungawilohna neite thu thlen theihna turin thla hnih chhung awh ram pum huap campaign – ‘Vote Bachao, Desh Bachao’ an kalpui mek tih a sawi.
He thu aupui mektu Lok Sabha opposition leader Rahul Gandhi-a’n West Bengal, Karnataka-a Mahadevapura Assembly constituency leh Maharashtra-a Congress party-in voter hming paih, vawi engemawzat dahlut tura an ngen tawh tihhlawhtlin a la nih loh thu sawiin, Mizoramah MPCC pawh he campaign kalpui tur hian hna an thawk tan tawh tih a sawi a ni.
Vote nei tawh zawng zawng chu, an hming paih an nih pawhin hlau loin, vote an neih leh theihna atan rawn auchhuak turin an ngen tih AICC hotu hian a sawi a. AICC ruahman ang chuan, October 25 atangin campaign beihpui hi thlak tan a ni anga, polling booth level-ah dan loa voter hming paih nia sawi awmnaah ‘Vote Bachao, Desh Bachao Chaupals’ buatsaih tur niin, mipui an kawm anga, vote chungchanga an buaina leh phunnawina chu a dik a nih chuan, thuneitute hnena thlen turin an pui dawn tih a sawi a ni.
November 1 khian New Delhi-ah INDIA Bloc-a an thawhpui party-te nen hemi chungchangah tho hian Mega National Rally neih an tum a, hetah hian tel turin mipui a sawm tih a sawi.
Electoral roll atanga diklo taka paihte kan pui dawn – AICC observer
