Kolasib district Sethawnah electric ban sawn tumtu zinga mi pathum chu electric man vangin an thi a, midang pathum an hliam bawk.
Thudawn danin, Kolasib district-a four lane kawngpui laih avangin Sethawn RTP Farm bul kawngpui sira electric ban, LT line awm chu NHIDCL hnuaia sub contractor-in an sawn a, September 19 chhun dar 12.00 vel khan hnathawktu 6 chu LT line an zawn sawnna lamah 11 kV line an tawk palh avangin electric hian a man nia hriat a ni. Mi 6 hi Kolasib District Hospital panpui nghal ni mah se, an zinga mi pathum – Lalrinawma (18), Vawngawnzo Mamit district, Lalruatfela (20) Thingpuikul Manipur leh Thianhumhim (16), Haikhawl khua Myanmar chu chhan theih an ni lo.
Midang pathum – Upal Chakma (17), Tlabung Zodin; Lallawmzuala (22), Zokhawthar leh Siangremlal (16), Haikhawl Myanmar erawh hun engemawchen nikhaw hre loa an awm hnuah an harh chhuak a, dinhmun ngaihtuahawm lutuk an ni lo tih sawi a ni.
Electric current man vanga thi mi pathum ruang hi Koalsib District Hospital-ah posmortem nghal niin, Sub-Hqrs. YMA Kolasib-in kuang an siamsak a ni.
Thudawnna sawi danin, eelctric ban sawn tumtute hian an hnathawh chhung power shutdown turin Power & Electricity department an ngen a, hmun thum atanga shutdown niin sawi a ni.
Electric ban sawn tum mi 3 electric man vangin thi
