Daily Newspaper

Electric bill chawi dan/Tariff chhut dan

185

R. Lalrinkima
Hidden Lodge
Chanmari, Aizawl.

Khatia mi tam tak an electric hman man/bill an chawi dan chungchanga an phun fo mai kha Temami Pa chuan a la ngawih pui mai thei lo a, hetiang ngaihtuahtu Joint Electricity Regulatory Commission (JERC), Manipur & Mizoram lam thu leh hla a bih vung vung a.

JERC hi Central sawrkar in electric bill siamdan chungchang ngaihtuah tura thuneihna a pek leh Commission hi a din a ni a, keini leh Manipur hian kan intawm a, he Commission-a Member hi Er Lalchharliana Pachuau ( B.E/Elect) niin sawrkar hian a awmna awm takah an rawn dah hi a lawmawm hle. JERC hi chuan Electricity Board an enkawl ve lo a, Government leh Corporation chauh an enkawl thung a ni.

Electric kan hman man hi electric siamchhuahna leh semzaina enkawltute sawrkar an ni emaw ni lo emaw, Corporate/Corporation (khawtlang aiawha pawl ding) an nih emaw pawh hian a rate hi a sangin a hniam kher lo a. A awmzia chu sawrkar-in an enkawl a nih avangin a hniamin a sang a ni lo ang bawkin Corporation-in an enkawlin a hniamin a sang bik kher lo tihna a ni. Hmarchhakah hian Mizoram leh Nagaland chauh hi power sem darh leh electric hman man buaipuitu chu sawrkar an ni a, Tripura leh Manipur ah chuan Corporation niin a dang hoah chuan Electricity Board an ni hlawm thung.
Tuna Mizoram-a power/electric kan hman man, Domestic (inchhung khawsak atana hman bik) hi han thlur lawk ila:-
Dt 1.4.2020 atanga hman tan-

(a) Unit 1 atanga Unit 100 chin rate chu Rs 3.30 per unit:

Unit 1 hmang ta la, Rs 3.30p i chawi ang a, unit 100 i hman thleng khan unit khat rate chu Rs 3.30p a ni. Tichuan unit 100 i hman chuan 100 x Rs 3.30p = Rs 330.00 i chawi dawn tihna a ni a, Unit 95 lo hmang ta la, Rs 3.30 x 95 = Rs 313.50p a lo ni dawn a nih chu.

(b) Unit 101 atanga Unit 200 chin Rs 4.80 per unit.

Hetah chuan a tehfung/rate intanna chu Rs 4.80p a ni daih tawh mai, Unit 100 i pel tawh a, i chhiar tan lehna tur chu Unit 101 a ni ta. Tichuan Unit 101 i hman chuan Rs 4.80p x 101 = Rs 484.80p a ni ang, chutiang zelin Unit 200 i hman thleng kha chu Unit khat rate Rs 4.80p a ni reng dawn a ni.

(c) 200 chunglam Rs 5.30 per unit.
A chunga hrilhfiahna pahnih atang hian mahnia inchhut theih a nih tawh ka beisei a, energy bill-ah khan previous meter readings tih a awm ang a, chumi piahah chuan present meter reading tih a awm leh ang. Present reading atang khan previous reading kha paih la, chu chu electric/energy/power (unit) i hman zat a lo ni ang. Unit 1-100 thleng khi rate hmasa ber khian i chhut ang a.

(d) Fixed charge, load 1kW khat zelah thlatin Rs 50/- ( hei hi bill hnunglam ‘Electric
hmangtute hriattur’ tih-a Category hnuai Domestic LT tih zawn phei Fixed charge per month tih zawn thlaah i hmu ang)

(e) Meter Rent ( hei hi bill hnung lam ‘Electric hmangtute hriattur‘ tih hnuaiah a awm a, mi tlanglawn zawkin kan hman, AC,Single Phase energy meter, whole current tih zawnah khan Rs 20.00 per month tih a lo inziak ang.

Hengte hi uluk takin Temami Pa chuan a bih a, chutah dawhkan drawer-a a bill dawn chu a chhut ve ta a:-

Power & Electricity Department-in thlakhata power a hmantur tam thei ang ber/a intiamkam zat(Connected/Contracted Load) an zawh khan (3.48kW/kVA=348 Unit) a lo tih avangin thlakhatah unit 348 bak hmang lo tur a ni. Tichuan unit 1-100 thlengah Rs 330.00 a chawi a, 101 atanga 200 thlengah 480.00 a chawi leh thei a, a chuang 180 chu Sl No(c) rate ang khian a chawi dawn a ni. Present Meter readings ah 51450 unit a ni a, Previous Meter Readings ah 51122 unit a ni a, a inthlauhna chu (51450 – 51122 ) 328 Unit a ni. Unit 200 thleng manah Rs 330.00 + 480.00 = Rs 810.00 a chawi tawh phawt a, Unit 128 man, Unit khat Rs 5.30 in a chhut leh a, Rs 5.30 x 128 = Rs 678.40p a lo ni ta a. A vaia belhkhawmin Rs 1488.00p a ni ta. Hei hi Bill hmalam dinglam hnuai, Bill Details tihah a lo lang ta kuau a, heta lo lang tel chu Other charge tiha khi ta {Sl(c)} tarlan Rs 20.00 a ni. Tin, thlakhata hman tur zat intiamna 3.48 kW/kVA (Unit 348) tan unit khat Rs 50.00 hmang khian 348 x Rs 50.00 = Rs 174.00 a lo ni leh a, thlakhata Bill pumpui chu Rs 1682.40 i.e (810.00 + 678.40p + 174.00 + 20.00 ) a ni ta a, Rs 1683.00 ah hrualmum a ni a, chu bill pek theih hun chhunga pek a nih chuan chawi tur a ni.

Chuti ni loa last date hnua pek a nih chuan Rs 34.00/- chawi belhin Rs 1717.00 a lo ni tawh ang.

2. 1.4.2020 atanga Nagaland-a an hman ve dan chu :-
(a) Unit 1- 30 chin Rs 4.70 per unit.
(b) Unit 31 – 100 thleng Rs 5.45 per unit.
(c) Unit 101- 250 thleng Rs 6.00 per unit
(d) Unit 250 chunglam Rs 7.00 per unit.
(e) Fixed charge Rs 200 per kW per Month.
Hetiang hian tuna bill a dawn chu a chhut leh ta a:-
Unit 30 thleng Rs 4.70 x 30 = Rs 141.00
Unit 31 – 100 thleng Rs 5.45 x 70 = Rs 381.50p
Unit 101 – 250 thleng Rs 6.00 x 150.00 = Rs 900.00
Unit 250 chunglam ah unit hman zat chu 328 -250 = 98 Unit Rs 7.00 x 98 = Rs 686.00
Fixed charge Rs 200.00 x 3.48 (thlakhata kan hman tur intiam zat)
= Rs 696.00 TOTAL = Rs 2804.50p

Tichuan Nagaland ai chuan Mizoram-a kan bill chawi hi chu a la hniam hle.

Tikhian sawrkar enkawl Electricity Department pahnihte electric hman dan chu kan hmu ta a, sawrkar leh Electricity Board enkawl loh Manipur leh Tripura te rate hmandan ve thung chu hetiang hi an ni.

3. Manipur (1.4.2020 atangin)
(a) 100 unit thleng Rs 4.20 per unit
(b) 101 atanga 200 chu Rs 5.50 per unit.
(c) 200 chunglam Rs 6.40 per unit.
(d) Fixed charge Rs 60 per kW per month.

4. TRIPURA hian keini angin Commission an neih mumal loh vangin an rate hi a up-date lo hle a, 1.4.2014 a mi tariff an la hmang reng, a thar tur an buaipui mek.
(a) 1 atanga 50 unit chin Rs 4.17
(b) 51 atanga 150 unit Rs 5.45 per unit.
(c) 151 atanga 300 unit Rs 6.16 per unit
(d) Unit 300 chung lam Rs 7.20 per unit.
(e) Fixed charge Rs 50 per month per connection.

Temami Pa thil chhut chuan bill complaint dawn pawha complaint dan tur hrechhuakin bill tihsual pawh lo dawng se chiang deuhin a complaint thiam dawn tih a chiang ta hle.

Hetia han thlir hian Mizoram hian kan chawi tlem ber a, power supply kan neih loh chuan fridge a hman theih loh a, TV a en theih loh a, theih loh a tam khawp mai.

Electric kan hman tangkai dan leh kan nitin nuna tui(water) tluka a pawimawh dan ngaihtuah hi chuan kan bill chawi hi chu a sang lo viau. Thlakhat chhunga electrical appliances (Computer, fridge, Television, heater/geyser, Fan,Air-conditioner,Istiri etc) kan hmante tel lo hian an aiawh tur hi kan nei ang em? Generator thenawmte nen kan inleitawm a nih ngawt loh chuan buaithlak ve tak chu a ni.

Chuvangin bill lama phun phun lo hian a renchem lamah hian tanlak zawk a ngaihzia Temami Pa chuan sawi mawlh mawlh a ni.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy