Elon Musk a hausa leh ber tawh
Bloomberg Billionaires Index-in an tarlan danin Elon Musk hausakna chu dollar tluklehdingawn 187 a kai leh ta a, Musk chuan khawvela hausa ber nihna chu France pahausa Bernard Arnault nen atangin a la let leh ta.
Elon Musk hausakna a rawn pun lehna chhan hi a electric vehicle company Tesla share man a pun vang a ni a, Tesla share hlutna hi 92%-in a pung a, hei hian Musk hlutna pawh a tipung ve lehnghal a ni.
Bloomberg Billionaires Index-in a tarlan dan chuan Musk hausakna hi dollar tluklehdingawn 187 a ni a, Bernard Arnault hausakna hi dollar tluklehdingawn 185 a ni ve thung.
Elon Musk hausakna hi nikum November leh December thla chhung khan dollar tluklehdingawn 200 chuangin a tlahniam thut mai a, khawvela thawklehkhata hausakna hloh nasa ber record a ni nghe nghe a, Musk pawhin a hausa ber title chu Bernard hnenah hian a hloh phah ta a ni.
Elon Musk hi Tesla chief executive a nih bakah vanthengreng a zin chhuahna tur rocket siamna company SpaceX leh social networking app Twitter neitupa a ni bawk. Musk hian nikum April khan Twitter hi dollar tluklehdingawn 44-in a lei a, Twitter-ah hian CEO a ni nghal a, Twitter a lei hnua hnathawktu 3700 chuan a ban tawh bawk a ni.
Elon Musk a hausa leh ber tawh
