Daily Newspaper

Endik runpuiah ni thum chhunga hri kai hmuh 3.32%

15

Aizawl, July 23 : Aizawl leh a chhehvela Covid-19 darh nasa lutuk tur venna atana sample endik runpui neihah ni thum chhungin hri kai mi 479 hmuh a ni a, sample endik zawng zawng atanga chhutin za zelah 3.32 a ni.

Mizoram sawrkar ruahmannaa Aizawl Municipal huamchhunga Covid-19 darh zel tur chhutchah nan July 20 atang khan sample endik runpui neih a ni a, July 23 thleng khan neih chhunzawm zel niin, sample 14,433 endik tawh atangin hri kai 479 hmuhchhuah a ni a, sample endik zawng zawng atanga chhutin hri kai hmuhchhuah hi za zelah 3.32 a ni.

Sawrkar ruahman angin July 20 khan veng 5 – Tuirial, Bethlehem Vengthlang, Armed Veng South, Chhinga Veng, Saron Veng leh Electric Veng ah te sample endik runpui hi neih a ni a. Hemi tum hian hri kai 112 hmuhchhuah a ni. July 21-ah a hma nia endik tawhna – Armed Veng South, Chhinga Veng leh Bethlehem Vengthlang bakah Ramthar Veng leh Ch Saprawnga Truck Terminal Rangvamuala truck khalhtute endik atangin hri kai 226 hmuhchhuah an ni leh a ni.

July 22 khan Salem Veng, ITI Veng, Ramthar Veng, Bawngkawn leh Venghlui ah endik runpui hi neih niin, he chanchin buatsaih lai thlenga hriat danin sample 4,431 endik a ni a, hri kai 113 hmuhchhuah an ni.

State nodal officer on Covid-19 Dr Pachuau Lalmalsawma sawi danin, endik runpuia data hi uluk taka ennawn leh a la tul dawn a. Sample endik zawng zawngte hi COWIN portal-a thun vek a ngaih avangin result kimchang tarlan hian hun a duh hlek thin. Endik runpui atana volunteers – data entry operator 25 leh laboratory technician 24 an rawihte chu team 5-ah an then a, tuna sample endiknaa portal-a thun zung zunga result rang taka siam turin data entry operator volunteer lakbelh an la mamawh dawn tih Ningania Health minister hoa thutkhawmah a sawi a ni.

Sample endik runpui neih tan atanga nimin thleng, nithum chhung hian veng/khua 12 – Armed Veng South, Bawngkawn, Bethlehem Vengthlang, Chhinga Veng, Electric Veng, ITI Veng, Ramthar, Salem Veng, Saron Veng, Tuirial, Venghlui leh Ch. Saprawnga Truck Terminal Rangvamual ah te sample endik a ni tawh a. Vawiin – July 23 hian Baktawng Tlangnuam (Chhuanthar), Phun-chawng, Rangvamual, Sairang leh Sihhmuiah te neih leh tum a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy