Health department leh SELCO Foundation, Mizoram te chuan thawhdunna thuthlung ziakin, solar energy hmanga kawlphetha pekchhuahna chu Health Centre 300 chuangah bun a ni dawn a; kumin 2023 ral hmaa zawhfel hman tum a ni.
Kan state hi mahni hman khawp pawh kawlphetha siam chhuak lo kan nih avangin hmun dang atanga power chawk luh nan kan insengso nasa hle a. State chhung hmun kilkhawr tak taka health centre-te hi damdawi lam khawl pawimawhin han thuam that ni thin bawk mah se, power a mumal loh avangin a tangkai tur angin hman tangkai a ni thei lo thin.
Tuna hetia SELCO Foundation nena thawhdunna hnuaia health centre 300 chuang zetin renewable energy an hmang thei tur hian hriselna lamah thingtlang hmun kilkhawr zawka awmte hmasawnna thar duhawm tak a paw chhuak ngeiin a rinawm.
Mizoram hi tuikhuah hmanga power siam chhuahna lamah kan la hnufual a, chutih rualin ram zimte a nih avangin tuikhuah tam tak nei thei pawh kan ni lo. Hmasawnna thar lo piang zel karah, power mamawhna a sang tual tual lawi si a, state dang atanga chawkluh ngai dinhmuna awm reng hi hmasawnna kawng daltu lianpui a lo ni bawk si nen, power kan mamawh zat ang thar chhuak ve tura hydel project liantham ve deuh pahnih khat neih belh bak hi chu, renewable source of energy lam kan bawh nat a pawimawh dawn hle niin a lang.
Tun dinhmunah pawh hian, sawrkar hnuaia department zawng zawng office building-ah hian solar energy hman theih ni se chuan, grid line energy bill atana sawrkar sum sen zawng zawng hu hi hmasawnna hna dang thawh nan kan hum thei dawn tihna a ni. Hetiang zawnga hma kan lak si loh hi chuan, tawngkama ‘inrenchemna’ sawi vak vak a, a taka hlenchhuah tum leh si lo te hi kan ang mai dawn alawm.
Energy for Health leh a behbawm
