Eng level-ah pawh inlungrualna hian rah duhawm a chhuah thin – K Sapdanga

Eng pawlah pawh eng level-ah pawh inlungrualna leh thawhhona tha chuan rah duhawm a chhuah thin tih minister K Sapdanga chuan a sawi.
Inrinni-a neih ZPM Aizawl North III Block Unit Executive joint meeting-ah bialtu MLA, minister K Sapdanga chuan, kumin AMC inthlanah an bial chhungah mipui kaltlangin corporator pahnih an nei a, hna tha thawk tura thawhpui duhawm tak an nei thar chu a lawmawmin phurawm a tih thu a sawi.
“Eng pawl pawh hian kan mamawh ber chu inlungrualna a ni a, eng level-ah pawh inlungrualna leh thawhhona tha hian rah duhawm a chhuah ngei ngei thin. Innghirnghona hian chhung lam leh pawn lamah rah tha a chhuah ngai lo,” tiin, Block hruaitu tha tak tak an neih zarah an bialin vawiin thlenga lungrual takin ke an pen tlang thei chu a hmuh a nuam a, engemaw thawm tha lo deuh a awm dawn nia sawi a awm pawhin an Block hruaituten mawngzang tak leh remhre takin hma an la zung zung a, vawiinah a rah hlu tak an la tel zel tih a sawi.
Hei bakah hian Unit, Zonu leh Thalai an tangrual a, inthlan an hmachhawn tawha an chevel chuan hei hi fiah takin a tarlang tih bialtu MLA hian a sawi bawk.
“In mi hriat angin, politician ni ngai lo ka ni a, kawng engkimah ka zei lo fai vek ni hian ka inhria a, kan hruaitute kaihhruaina hnuaiah vawiin hi ka thleng a ni. Tunah kum hnih leh a chanve vel minister niin ram rawngbawl hna kan han thawk ve a, ka thawk rei tual tual a, ka tlin lohna ka hmuh fiah tial tial niin ka inhria a, theihtawp chhuaha in mi kaihhruai leh thawhpuina ka ngen a, kum hnih chuang lo la kal turah pawh hian nasa taka in mi fuihna leh thawhpuina ka mamawh dawn a ni,” a ti.
An pawl chu kum 2017-a din a ni tih K Sapdanga hian a sawi a. Theih ang angin tling lo tak chungin a hruaitu bawrah an awm ve a; Pathian, mipui leh bial mipui zarah kum 2023-ah helai bialah thlan thlin a ni ve a, amah thlangtlingtu zawng zawng chungah lawmthu a sawi nawn tih K Sapdanga hian a sawi. “Ram pum huap thil hrang hrangah ngaihtuahna sen a tul avangin keimah ngei pawhin ka duh angin bial tan hma ka la tawk lo tih ka hria a, theih tawp chhuahin he bial tan hian kan theihna zawnah hmala zel turin kan tangho zel dawn nia” a ti.