September 1 khan Central sorkar chuan President hlui Ram Nath Kovind kaihhruai panel dinin an tihtur ber chu ‘one nation, one election’ (ONOE) plan kalpui theih a nih leh nih loh tur enfiah a ni.
Eng nge ONE plan?
ONOE in a tum ber chu Lok Sabha inthlan leh State Assembly inthlan a ruala neih dan ngaihtuah niin a tum ber chu ram puma inthlan thleng zing lutuk tihtlem a ni ber.
January 26, 1950 a Constitution hman a nih tan hnuah kum 1951-1952 khan a rualin Lok Sabha leh State Assembly te chu tum khata inthlanna neih a ni. A hnu tum thum lai kum 1967 thlengin neih chhunzawm zel a ni a.
Kum 1959 khan Centre-in khatih laia Kerala sorkar thiata Article 356 (failure of constitutional machinery) a puan chuan a tibahlah hmasa ta ber a ni.
He mi hnu hian party chhuahsan defection te leh counter-defection te avangin Legislative Assembly thahnem tak te chu kum 1960 hnu lamah thiahin a awmzui a, chu chuan Lok Sabha leh State Assembly inthlan a hrana neih chu a hring ta a ni. Tunah hian Arunachal Pradesh, Sikkim, Andra Pradesh leh Odisha te chauh chu Lok Sabha inthlan ruala assembly poll neite an ni.
‘One Nation, One Election’ (ONOE) chungchang?
August 2018 khan Justice B.S. Chauhan kaihhruai Law Commission of India (LCI) chuan a ruala inthlan chungchangah draft report tichhuakin chutah chuan constitutional leh dan lama zawhna awm thei te a chhang a. Chiang takin, Commission chuan a ruala inthlanna neih chu tuna Constitution kan hman behchhan hi chuan kalpui a rem lo tiin a sawi.
A ruala inthlan kalpui tur chuan Constitution-ah Representation of the People’s Act 1951 leh Rules of Procedure of Lok Sabha bakah State Assembly-te chuan amendment an siam a ngai, a ti.
Mahse Commission chuan ONOE kalpui a nih chuan public money tam tak humhim a ni thung ang a, administtation leh security forces te pawh awmze nei zawka hman niin sorkar policy te tha zawka kalpui theih ni dawnin sorkar pawhin inthlan ringawt aiah developmental activity te a ngaihtuah thei zawk ang, a ti.
Kum 1999 daih tawh khan Justice B.P. Jeevan Reddy kaihhruai LCI chuan a ruala inthlanna neih chu a lo thlawp tawh bawk.
Ngaihmawh awm thei?
A pawimawh lai ber chu kalpui theih tak tak a ni ang em tih ber chu a ni. Article 83(2) leh 172 of the Constitution chuan Lok Sabha leh State Assembly chu kum nga chhung atan Article 356 hmangin thiah a nih ngawt loh chuan a hun chhung a tuksak a. Hei vang hian ONOE plan chuan zawhna siam ta in – term hman laklawh laiin Central or State sorkar chu tluchhe ta se? Inthlan chu State tinah neih leh vek tur nge President’s rule puan a ni ang? Constitution siam danglam ringawt chuan thil dang tam tak kaihhnawih hrang hrang siam that ngei ngei tur a nei nual dawn bawk si a ni.
Pahnihnaah chuan ONOE chu ‘federalism’ concept nen inkalh tlatin, Article 1 in India chu ‘Union of States’ a tih chu ram chu ‘pakhat’ tia sawi chuan a kalh ta tlat bawk.
Pathumnaah chuan tuna inthlan dan kalphung hi democracy tan hlawkna zawk niin voters te chuan an ngaihdan leh thlir dan zing zawkin an tarlang thei zawk bawk. National leh State poll a ngaih pawimawh te chu a inan loh avangin tuna kalphung pangngai hi chuan accountability sang zawk a thlen a ni.
Central sorkar chuan inthlan zin avanga sum sen tam lutuk chhuanlamah a nei bawk a. Mahse, hei hi thutling a ni chiah lova ngaih a ni thung. Kum nga chhungin inthlan sensoah Election Commission chuan Rs 8,000 crore vel a seng a, kum khata Rs 1,500 cr vel zel seng ang niin voter pakhat laka kum khatah sum sen chu Rs 27 vel zel niin chu chu turu lutuk anga ngaih chi a ni lovang tih a ni bawk.
Centre chuan Parliament Special Session September 18 leh 22 a neih turin a ko va. Heta agenda tur hi tun thlengin sawi chian emaw a la ni lo thung. Mahse, sawi danah chuan Special Session-ah hian a ruala inthlan chungchang chu khelho tur a ni dawn tia sawi a ni thung. Hetih lai hian Oppostion te chuan a ruala inthlanna neih chu an duh dawn loh thu langsar takin an sawi lang nghal tawh bawk.