European Union (EU) leader te chuan Ukraine-in EU a zawm theih nana inbiakna neih tan an rem ti a. Hungary Prime Minister Viktor Orban, Ukraine member a nih dodaltu chuan EU thutlukna siam chu a dodal chuang lo. Mahse, EU in Ukraine hnena tanpuina 50 billion pound pek a tum chu a dang hmak thung.
Ukraine chungchanga Hungary dinna?
Prime Minister Orban hi right-wing leader niin Russian President Vladimir Putin nena inthian tha tak an ni. April 2022 khan thlan tlin nawn leh niin Ukraine President Volodymyr Zelensky chu a hneh tul ‘elpui’ pakhat tiin a sawi a. Ukraine sorkar chu eiruknain a hual vel a ti a, chuvangin EU member ni turin a la inpeih lo a ti bawk. A ngaihdan chuan Ukraine chu member a nih hmain EU strategic partner la ni phawt se a ti.
EU member state Hungary te ang tana fund dil pawh pek an nih loh laia non-EU member-in fund tam tham tak financial package a dawn ngawt chu a remti thei lo bawk.
A phena thil awm?
EU chuan a hmain Hungary chuan EU-in law and order leh judicial independence a kalphung a neih a bawhchhia tiin funds pek tur a dangchat a. Analysts te chuan Hungary chuan heng a fund mamawhte neih theih nan hian Ukraine hnena fund pek tum leh member nih a tumna chu veto power hmanga danchaha a duh fund hmuh nana remchanga hman a tum an ti.
A nihna takah chuan EU summit neih hma lawkin EU chuan Hungary hnenah hian hmin a nih nan a fund an hrensak $10 billion a pe a, chu chu Orban a ngawihtir tumna tih a ni. Mahse, European Commission thung chuan fund an pek chhuah dan sawiin Hungary in EU in judicial reform an ngiat a tihhlawhtlin tak vang an ti thung.
Mahse fund pek chuan awmzia a nei tih a lang tia sawi ni bawkin EU leader 27 tena meeting an neihnaah German Chancellor Olaf Scholz ngenna angin Orban chuan meeting a chhuahsan a, a chhuahsan hnuah member dang 26 te chuan Ukraine in EU member a nih theih nana sawihona an tan thei ta a ni.
Ukraine chu EU member a ni dawn chiang ta tihna a ni em?
Ni lo, EU member nih hi kawng awlsam a ni lo va, thil thui tak sorkar na kaihhnawih tam tak tihhlawhtlin hmasak phawt ngai a ni. EU dintu member ram paruk tel lovin tuna member ram 21 te hian EU member an nih theih nan hian kum kua vel lawih mamawh zel ang an ni. Orban ngei pawhin Ukraine in member nih a dilna tikhawbaw turin hun a tam lutuk tiin a sawi nghe nghe.
Ukraine memership a kaltlang theih nan hin EU ram tin Parliament tena remtihna an pek a ngai a, chung zingah chuan Hungary pawh a tel tlat si a ni. Chuvang tak chuan Orban chuan Ukraine member a nih theih nana inbiakna neih remtiha a tel loh chu pawitihlohna a nei a, a hnu zelah harsatna la siam theihna hun tam tak a nei a inti tiin analysts te chuan an sawi.
Engtin nge EU in Ukraine hnenah tanpuina a pek zui ang?
Orban a zuai duh loh zui zel chuan EU chuan member ram 26 te nen trust an siam thei. Mahse, chu chuan hun a awh rei dawn thung a, fund mamawh em em Ukraine tan harsatna a ni thung ang. Putin tan thung chuan lawmna a ni ang a, fund pek a tlai poh leh Russia sipaite chuan frontline an dinhmun an siam tha nghet thei dawn a ni.
Eng vangin nge EU package chu Ukraine tan a pawimawh?
President Zelensky chuan indona hne avanga Ukraine-in Russia a dona a thlawpna chu a zuai a hlau a, a bik takin US lakah. US bikah pawh Republican lawmaker te chuan sum tam tak Ukraine an pe chunga Ukraine-in hma a sawn hlei thei lo chu an hne tawh tia sawi niin American tax payer dollar te pek zel a tul tawh lo tih ngaihdan awmin indonaah chuan Ukraine chu chak zawk dawn chuang lova ngaihna a piang tih a ni. Republicans te chuan President Joe Biden chu Ukraine hnena tanpuina $ 61 billion an pek leh dawn chuan immigration policy a tikhauh tur a ni tiin an kar mek bawk.
US Presidential election chu nakum maia neih tur niin Donald Trump ‘America First’ policy kalpuitu thlan tlin a nih chuan US-in Ukrainian indonaa thilphal taka sum a pek chu tihtawp a nih rin a ni bawk. Chuvang tak chuan Zelensky tan chuan sum a mamawhnaah hun a nei tam lo.
Ukraine leh Russia indonaah khawthlang ram te chu Ukraine innghah burna an ni a, khawthlang ramte sum leh ralthuamah a innghat bur mai a ni. Hei vang tak hian Ukraine tan chuan khawthlang ram tena an thlawpna tel lo chuan Russia chu hneh ngaihna a awm reng reng lo va. Chu chu Ukraine President Zelensky ngei pawhin a hriat chian em avangin ngenna hrang hrang a siam tawh chungin khawthlang ramteah indona hne-na leh Ukraine chu hmasawn thei lova puhna leh ngaihna nasa tak a piang mek a ni.