Engineer-te tan Mizoramah chona a awm
India hmarchhak, a bikin Mizoram chu chhengchhia leh ram leilung venthawn ngai a nih avangin India rama engineer-te tan chona leh a taka an thiamna lantirna hmun tha a ni tih larsap Gen. Vijay Kumar Singh (Retd) chuan a sawi.
The Institution of Engineers (India) buatsaih IEI Industry & Education Excellence Summit & Award 2026 chu “Engineering India’s Global Footprint: Technology, Talent & Trust” tih thupuia hmangin Inrinni khan New Delhi-ah neih a ni a. Hmanpuitu Mizoram larsap hian, India ram hmasawnna rahbi zawhah engineer-ten hmun pawimawh tak an chang a. Khawvel thiamna sang zelah thil dehchhuah hralhna mai ni lo, thiamna neih leh mar pata tan lak kawnga inel mekna karah, India ramin thiamna leh theihna a neihte tangkai taka chhawr thiam a tul, tiin, engineering thiamna hmanga hnathawh chu hna tha, tlo leh rintlak tia hriat hlawh a nih theihnan theihtawp chhuah turin a chah.
Hmarchhak state chu hmun chhengchhia, a ram leilung venthawn ngai, India rama hmun pawimawh taka awm lawi si an ni tih sawiin, engineering hna thawh kawngah harsatna awm bawk mah se, hmasawnna thil thar leh danglam bik thlenna hmun remchang tak a ni thung tih a sawi a. Hmarchhak ram leilung chhengchhe tak chu engineer tana chona leh a taka thiamna lantirna a ni a, a bikin Mizoramah hmasawnna ruhrel din turin tlangram chhengchhia leh sik leh sa laka him bakah tunlai thiamna hman a tul tih a sawi a ni.
Digital India, vansang boruak zirna leh thiamna, geospatial technology, defence engineering, artificial intelligence leh tunlai thiamna hrang hranga India dinhmun leh tun aia hma sawn tura engineer-te mawhphurhna leh tan lak ngaihna lai a sawi a. Engineer tam tak chher chhuah ringawt a tawk lo tih sawiin, “Engineer rawn chhuak zel turte chuan thiamna nghet tak an neihte zau zawka ngaihtuahna senga an chhawr thiam a tul a, degree an dawn zatah niloin enge an ngaihtuah chhuah theih, tihah kan teh zawk tur a ni,” Gen. Vijay Kumar Singh hian a ti.
India ram thiamna leh theihna ram dangin an rin ngam theihnan kan thil dehchhuah a tha tawk em, tih leh, tehkhawng a pha em, tih thlenga ngaihpawimawh a tul tih a sawi bawk.
He summit-ah hian industry hotu, policy siamtu, zirmi leh engineer-te telin, khawvel pum engineering leh technology lama India ram hmasawnna leh pawimawhna an sawiho a ni.
Institution of Engineers (India) hi kum 1920-a din a ni a, engineering peng hrang hrang khaikhawmtu pawl lian ber a ni. Tun dinhmunah engineering peng hrang hrang 15 atangin corporate member 260000 chuang an awm.
Engineer-te tan Mizoramah chona a awm
