Daily Newspaper

England-ah virus chi dang hmuchhuak

15

Coronavirus chi dang hmuhchhuah niin hei vang hian England-ah chuan khuahkhirhna khauh zual taka kalpui a ni a. European ram hrang hrangte chuan UK atanga khualzin tena an ram an luh a khap nghal bawk.

He coronvairus chi dang hi thla rei lo te chhungin England hmun hrang hrangah a leng darh tawh tih finfiah a ni a.

Sorkar chuan coronavirus chi dang chu a hma ami te aia inkaichhawn awlsam zawk niin an sawi bawk a. Hmuhchuah thar deuh chauh a nih avangin zawhna chhan tur a la tam hle thung.

Eng vanga hlauhawm nge a nih?
He coronavirus thar hian a hmaa mi te a thlak zung zung a, a insiam chak em em bawk nia sawi a ni a. Mahse, chiang takin hriatfiahna a la awm lo thung a.

London khawpuiah chuan he virus chi dang avang hian khuahkhirhna khauh zawk kalpui zui a ni bawk a.

Eng tianga chakin nge inkaichhawn theih a nih?
Kumin September thla khan he virus chi dang hi hmuhchhuah niin November thlaah chuan London khawpuiah a leng darh nasa hle tawh a, December-ah meuh chuan Covid-19 kai hmun thuma thena hmun hnih te chu he virus chi dang kai te an ni der tawh a ni.

Tuna virus insiam danglam leng mek hi a hma aiin 70% in inkaichhawn a awlsam zawk nia sawi a ni a. Imperial College London a thawk Dr Erik Volz chuan, “A nihna chiah sawi turin kan la belchiang tawk lo va. Mahse, kan hriat theih chinah chuan a darh chak em em a, a hmaa mite ai daihin inkaichhawn a awm sam a ni,” tiin a sawi.

Khawi khawiah nge a darh tawh?
He virus chi dang hi UK a dam lo te atanga hmuh a ni a, ram dang atanga chawkluh pawh ni theia ngaih a ni a. Tunah chuan UK hmun hrang hrangah leh Northern Ireland-ah te hmuh a ni tawh a. Mahse, London khawpuiah a kai tam berin hei bakah hian South East leh Eastern England ah te hmuh tam a ni bawk.

He virus thar hi Denmark, Australia-ah te pawh hmuh tawh niin Netherlands pawhin an ramah an hmuh thu a sawi tawh bawk. South Africa-ah pawh virus thar hmuh chhuah niin mahse England-a hmuh nen hian a inang lo thung.

Tun hmain a thleng tawh em?
Thleng tawh e. Wuhan, China a virus hmuhchhuah leh khawvel hmun hrang hranga leng mek te hi a in ang lo. Kumin February thlaa D614G leng darh kha khawvela hluar ber a ni a. Kha bakah khan a chi dang A222V pawh hmuhchhuah niin hei hi chu Spain-ah a ni deuh ber thung.

Tuna virus chi dang hi damlo immune system chak lo tak atanga insiam chhuak nia ngaih a ni a, an immune system chak bawk si lo virus do zo lo te chu an taksa chu virus insiam belh zel nana hmunpuiah siam a ni ta nia ngaih a ni.

Inkaichhawn awlsam a nih avang hian a hlauhawm zual em tih hriatfiah a ni lo va, mahse, inkaichhawn awlsam zual a nihna hrim hrim chu a hlauhawmsa tawhna a ni thung a ni.

Vaccine-in virus thar a ngam ang em?
Mithiamte chuan a ngam tho an ring a. Tuna khawvelin vaccine pathum a hmuh mekte hi immune system tihchakna vek a ni a. Vaccine te chuan immune system chu virus te bei turin a ti ta thin a, hei vang hian tuna virus chi dang pawh hi a ngam tho tura ngaih a ni.

Mahse, hlauhawm ve tho chu virus te chuan vaccine te bum tumin chet an la zui ve zel thin a. An bum theih hnuah chuan vaccine nih tur ang takin a thawk thei lo va, chuvangin virus chu a thi zo ngai lo, chung chu thil thleng thei reng a ni bawk.

European Union ram hrang hrang te chuan Pathianni atang khan UK leh Germany flight te an titawp nghal a, hei hi tuna coronavirus chi dang darh zel loh nana an hmalakna leh Europe a hmun a khuar nasat loh nana hmalakna a ni.

Netherlands chuan kumin chhung zawngin UK-ah thlawhna a thlawhtir dawn lo va, Belgium pawhin thlawhna UK-a thlawh khap zui nghalin hei bakah hian Britain nena inkalpawhna rel te pawh a titawp zui nghal bawk a.

Austria leh Italy te chuan United Kingdom-ah thlawhna thlawhtir an remtihzui loh tur thu an sawi zui ve nghal bawk.

Read More>> Full>> Epaper Subscribe Now

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy