Zirtawp zan atanga khan Europe khawmual atanga World Cup 2026 khel tur zawnna khelh tan a ni a. England, Wales leh Norway ten hnehin bul an tan hlawm.
Football ram ropui leh thawm na tak England hian zirtawp zan khan Wembley Stadium-ah Albania an mikhual lakah si hnih faia hnehna changin point thum an hmu.
England tan hian Arsenal rawlthar Myles Lewis-Skelly chuan bul a tan a, England senior team tan a inlan hmasak berah a chetha nghal hle a, minute 20-naah hmahruaina goal a thun. England tan a inlanna hmasa berah goal a thun nghal hian Lewis-Skelly hma lam hun enzia a tilang chiang leh zual a. Arsenal leh England player pawimawh ni chho zui ngei tura ngaih ngheh a ni.
Minute 20-na lekah goal thun nghal mah se England hian beisei angin an khel tha tawk lova, goal pawh an thun belh thei lawk lo. Goal lut a awm belh theih loh reng hnuin captain Harry Kane chuan minute 77-naah an goal hnihna a thun a, an hmahruaina a tizau. Kane goal thun hnuin goal dang a luh belh thei tawh lo va, England chuan an mikhual Albania lakah 2-0 in hnehna an chang a, point thum an hmu nghal. Manager thar Thomas Tuchel hnuaiah hnehna an chang nghal hi Three Lions tan bul tanna tha a ni.
England hian zanin hian World Cup khel tur zawnnaah vek Latvia an hmachhawn zui leh dawn. Latva an hmachhawn hunah hian Albania an hmachhawn tuma hliam tuar Anthony Gordon a inlan thei dawn lo. Albania an hmachhawn tum khan Gordon hian hun tawp dawn hnaiah Marcus Rashford a thlak a. England tan a vawi 10-na atana a inlan tum hian hliam a tuar a. A hliam vang hian Newcastle United lamah tum aia hmain a kir leh phah dawn ta thung.
Europe khawmual atanga World Cup 2026 khel tur zawnna hi inrinni zan khan khelh chhunzawm a ni a, Wales leh Norway ten hnehna an chang zui ve leh.
Wales hian Cardiff City Stadium-ah Kazakhstan an mikhual. An mikhual lakah hian bul an tan tha a, inkhel tan atanga minute 9-na lekah Daniel James chuan hmahruaina goal a thun nghal. Hma takah goal thun mah se chawlhlawk hmain penalty an chawi thung. Kazakhstan tan Askhat Tagybergen chuan minute 32-naah penalty pet goal in an si phurh a sut a, 1-1 a inhnehtawk chungin chawlhlawk an hmang.
Chawlhlawk hnu lamah Wales an khel tha chhunzawm a, goal hnih thunin, goal an chhuah tawh lo. Wales tan hian minute 47-na lekah Ben Davies chuan hma an hruai nawn lehna goal a thun a. 2-1 a hma an hruai reng hnuin hun tawp dawn hnaih minute 90-naah Rabbi Matondo chuan an chakna nemnghet turin an goal thumna a thun a. An mualah 3-1 in an chak zui ta a ni.
Wales in an mualah hnehna an chan laiin Norway chuan Mimuala an khingpui Moldova chu 5-0 ngawtin an sawp a. tha chungchuang takin bul an tan ve thung.
Stadionul Zimbru-a lenglut Norway tan hian Julian Ryerson chuan inkhel tan atanga minute ngana lekah hmahruaina goal a thun a. Ryerson goal thun hnu hian chawlhlawk hmain Erling Haaland , Thelo Aasgaard leh Alexander Sørloth ten goal an thun belh zui leh a, si thum faia hmahruai chungin chawlhlawk an hmang. Chawlhlawk hnu lamah Aron Donnum chuan goal hnih a thun belh zui leh a. An len luhna mualah nuamsa taka hnehna changin point thum an hmu a, World Cup 2026 khel tur zawnnaah result tha tak a nei a, inrintawkna sang zawk nen an inlan chhunzawm ang. Norway hian tunlaia player tha tak tak an nei a. Inelna lian World Cup leh Euro te an hmachhawn lo vang vang tawh a. World Cup 2026 ah erawh inlan ngei an tum tawh thung ang.
England, Wales leh Norway te an chak nghal
