Daily Newspaper

EPL 2019-20 a chethate

10

English Premier League 2019-20 season chu khelh zawh a ni ta a, season khat chhunga tehna hrang hranga player chetha; dailymail-sport in a tarlan chu tun tumah hian kan rawn tarlang dawn a ni.

Team tana goal thun hnem
EPL 2019-20 khelh zawh takah goal 23 thun a, Golden Boot dawngtu chu Jamie Vardy a ni. Tun tuma team tana goal thun hnem erawh hi chu team in goal an thun zawng zawng atanga team tana thun tam zual thlanchhuah a ni ve thung. Team khata player malin goal 30 lo thun pawh nise player dang dangin goal an lo thun ve teuh si chuan he huangah hi chuan dinhmun sang an luah thei lo. United tan pawh goal 10 thun tling player panga zet an awm a, hemi huangah hi chuan City player hi an lang phak lo reng a ni. Team khatin goal an thun zawng zawng belh khawm atanga team tana thawhhlawk, goal thun tam ber chu Danny Igns a ni.

EPL-a goal 22 thuntu Danny Igns hian Southampton in EPL-a goal an thun zawng zawng zatve dawn a thun tling a, team tana a goal thun zat hi 43.1% zet a tling. Southampton hi team lian ni lo mahse EPL-a goal 22 zet thun thei Igns hian player tha a nihzia a pholang chiang hle.

Pahnihnaah team talbuai, championship lama tlahniam chiang hma ber Norwich City tana goal 11 thuntu Teemu Pukki a awm a, goal a thun zat hi 42.3% a tling. Pathumnaah topscorer a nihna humhim zo lova, goal khat leka Vardy tluk lotu Pierre-Emerick Aubameyang a awm a, Gunners tan goal 22 thu nin, 39.3% a thun tling. Palinaah EPL Topscorer thar Jamie Vardy a awm a, a goal thun zat hi 23 (34.3%) a ni a, Wolves tana goal 17 (33.3%) thuntu Raul Jimenez chuan pangana a luah.

Shoot ngah zualte
EPL 2019-20 khelh zawh takah khan Liverpool forward Mohamed Salah chuan goan thun tumin a pet (shoot) hnem ber a, goal zawna pet dik tam ber a ni. Salah hian shot vawi 132 a nei a, heng zingah 59 hi shot on target a ni a, goal zawna a shot zat hi 14.39% a tling. Pahnihnaah Raul Jimenez a awm a, a ni hian shot vawi 118 a nei a, goal zawnah vawi 44 kalin 14.41% shot dik a nei. Pathumnaah City forward Gabriel Jesus (13.86%) a awm a, Roberto Firmino (9.09%) ten an dawt.

Ball pek (Passing)
EPL 2019-20 chhunga ball pe hnem ber chu Liverpool champion puitu Virgil van Dijk a ni. Netherlands defender Van Dijk hian vawi 3,253 zet ball a pe a, a ball pek dik zat hi 89.15% a tling. Pahnihnaah City player Rodri a awm a, a ni hian ball vawi 2580 zet pe in, a pek dik zat hi 92.83% a tling a, ball pek dik zatah chuan a sang ber hial. United defender Harry Maguire a awm a, anni hian ball vawi 2518 zet a pass a, 86.74% a pass dik. Anni bakah hian Jonny Evans (86.83%) leh Andy Robertson (2490 / 83.65%) te an awm bawk.

Ball chhuhsak hnem
EPL player zingah Leicester City midfielder Wilfried Ndidi chu mi ball chan chhuhsak hnem ber a ni a, vawi 80 zet ball chhuhsak (Interception) a nei. Pahnihnaah Bournemouth player Diego Rico a awm a, ball chhuhsak vawi 79 a nei. Ndidi leh Rico te hnungah hian Declan Rice (78), Chris Basham leh Jan Bednarek (77) te an awm ve bawk.

Save nei hnem
EPL 2019-20-ah khan Newcastle United si nghak Martin Dubravka a chetha hle a, goal thun tuma an pet leh tauh chu vawi 140 zet a dang a, hei hi 70.56% a tling hial a ni. Pahnihnaah thlahniam ta Norwich City si nghak Tim Krul a awm a, save vawi 132 (65.66%) a nei ve bawk. Anni bakah hian Bournemouth si nghak Aaron Ramsdale (129 &67.02%), Burnley si nghak Nick Pope (120 & 70.20%) leh Brighton si nghak Mat Ryan (117 & 68.24%) te an awm a ni.

Goal thun hnem
Champion thar Liverpool khan goal thun tumin shot vawi Liverpool 591 zet an nei a, heti zat shot atang hian goal an thun zat hi 14.38% niin shot an nei zat atanga percentage chhuta goal thun hnem ber an ni. Pahnihnaah Arsenal an awm a, shot vawi 406 an nei a, an goal thun zat hi 13.79% a ni. Liverpool leh Arsenal hnungah hian Tottenham (444 & 13.74%), Manchester City (745 & 13.69%) leh Leicester City (540 & 12.41%) te an awm.

Ball chang hnem
Season khat chhunga EPL-a ball chang hnem/game thunun ber chu Manchester City an ni a, Average possession (%) hi 66.6 zet a tling. City hi champion thar Liverpool in an dawt a, 63.47% a ni a. Chelsea 60.59%, Leicester City 57.36% leh Manchester United – 55.92% ten an dawt a ni.

Bul tantu thlak ngun
Manchester City hi club tha tak an ni a, an squad pawh a chhah tha tawk viau bawk. City manager Pep Guardiola pawhin bul tan tur nghet a nei lova, a thlak kual ngun hle. EPL 2019-20 season chhung khan bul tan tur vawi 144 lai a thlak thleng a, bul tantu thlak kual hnem ber a ni. Pahnihnaah Arsenal (104) an awm a, Brighton (99), Chelsea (99) leh Everton (98) ten an dawt a ni.

Bul tantu naupang
EPL 2019-20 season chhunga Manchester United tana bul tantu kum chawhrual chu kum 25 leh ni 96 a ni a, season liam ta chhunga bul tantu naupang ber an ni. United hnungah hian Bournemouth (kum 25 leh ni 237), Chelsea (Kum 26 leh ni 10), Everton (Kum 26 leh ni 27) leh Aston Villa (Kum 26 leh 42) te an awm ve bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy