Daily Newspaper

EPL 2019-20 khar a ni dawn ta

21

Naktuk, Pathianni zan khian English Premier League 2019-20 chu khelh zawh a ni ta a. Champions League khelh phak tum leh him hram tuma inelna bakah Topscorer nih tuma inelna boruak a lian hle dawn a, chu chu chanchin ngaihnawm a tling ang.

Ngaihvel hlawh United leh Chelsea
EPL 2019-20-ah hian champion a chiang tawh a, Manchester City chu pahnihna an ni chiang tawh bawk. Team lian Manchester United leh Cheslea te bakah Leicester City te chu Champions League khel phak thut thei an nih laiin khel pha lo thu thei an ni bawk a, Pathianni zana an inlan tur hi a pawimawh dawn hle.

Pathumna luah mek Manchester United hian King Power stadium-ah pangana luah mektu Leicester City an hmachhawn dawn a, an tan fiahna hautak tak a ni ngei ang. Leicester City hi an inhnehtawkpui thei a nih chuan UCL an khel phak dawn a, an tlawm a nih a, Chelsea in point an lo hlawhchhuak a nih si chuan United hian a zawnin UCL an khel phak dawn lo tihna a ni.

Champion hlui Leicester City tan Champions League khel phak turin chak a pawimawh leh zual. United lakah an tlawm a nih chuan UCL an khel phak dawn lo chiang a, an chak zo lo a nih pawhin Chelsea result-ah an innghah tel a ngai tawh dawn a, an dinhmun a tha lo hle. An mualah United an hneh a nih erawh chuan UCL an khel phak ngei dawn thung. King Power Stadium-a Foxes leh Red Devils inkhel tur hi pathianni zana inkhel ngaihven hlawh ber pawl a ni ngei ang.

Kar laihawla champion thar Liverpool ngam lo tu Chelsea pawhin khingpui hautak an nei ve dawn bawk. Parukna luah mektu Wolverhampton chu Stamford Bridge-ah an mikhual dawn. UCL khelh phak tuma inel zingah Chelsea hi an dinhmun a tha deuh berin a ngaih theih. An mualah point an hlawhchhuak a nih a, Leicester City leh United te inkhelah chak zawk an awm a nih chuan Blues hian palina an luah zui thei dawn a, an mualah an chak a nih chuan pathumnaah pawh inhlangkai thei dinhmunah an ding bawk.

Wolves hi paruknaah insawh nghet a, Europa League khel phak tura chak mamawh an ni ve bawk. Chelsea lakah an chak zo lo a nih a, Tottenham in Crystal Palace an hneh a nih bawk si chuan pasarihnaah an tla hniam dawn a, European competition-ah an inlan phak dawn lo.

Tunge him ang a, tu nge tlahniam ang
EPL 2019-20 khar dawn zan thlengin championship-a tlahniam tur pakhat chiah a la chiang a, tlahniam tur pahnih a la chiang lova, club pathum Aston Villa, Watford leh AFC Bournemouth ten him hram tumin fiahna hnuhnung an hmachhawn dawn.

Arsenal an hneh nawlh vanga relegation zone chhuahsan ve hlawl Aston Villa chuan United an inhnehtawkpui vanga him West Ham United an hmachhawn dawn a, Villa hi him theihna hun nei tha ber nia ngaih an ni.

Watford hian khualmualah Arsenal an hmachhawn dawn a, Arsenal laka point hlawh-chhuah hi a har tura ngaih a ni. Arsenal lakah hian mak takin chak nawlh pawh nise Aston Villa an chak a nih si chuan Watford hi an tlahniam dawn tho. Goal diffrence-ah chan chhe zawk an ni mek a, khingpui hautak tak an nei dawn bawk nen an dinhmun a tha lo hle.

Table hnuai ber dawttu luah mek AFC Bour-nemouth chuan khualmualah Everton an hmachhawn ve dawn bawk. Bournemouth hi an dinhmun a chhe leh zual hle. Goodison Park-ah chak nawlh pawh nise an chunga mite pahnihin point an lo hlawhchhuak ve a nih chuan championship-ah an tlahniam dawn tho tho. Chhiarkawp danin him thei la ni bawk mahse him tur chuan thil mak a thlen a ngai hial tawh niin a lang.

Table-ah 17, 18, 19 na luah mektute hian an match hnuhnung berah khualmualah vek inkhel an hmachhawn a ngai dawn a, an khingpuite an nem lo hlawm viau bawk. Khualmualah an chak thei an awm a nih chuan an dinhmun a hrilh thui hle tura ngaih a ni a. Khualmuala point thum hmu thei tan him theihna hun tha tak a awm a ngaih a ni.

Champions League khelh phak tuma inelna leh him tuma inelna karah Golden Boot dawn tuma inelna boruak a la nung ve reng bawk. Leicester City forward Jamie Vardy chuan goal 23 a thun mek a, goal hnihin hma a hruai mek. Southampton forward Danny Ings chuan goal 21 a thun tling tawh a, Sheffield United lakah a chethat chuan Vadry ala tluk ve thei a, tGoal 20 thuntu Aubameyang chu a lang pha meuh tawh lo.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy