English Premier League 2026-27 chu match nga khelh a ni ta. Match nga khelh tawh china chetha zualte an rating atangin thlan a ni a, chetha zual zingah Chelsea si nghak thar Emiliano Martinez a lang nawlh a, Arsenal si nghak David Raya an erawh hmun a awm ve lo thung. EPL 2026-27 a chetha zualte kan tarlang ang.
Emiliano Martinez (GK – 7.70/10) Arsenal si nghak hlui Martinez hian Aston Villa chhuahsanin London club lian Chelsea a zawm. A club thar hi result tha a la hlawhchhuahpui thei reng lo naa mimal takin a chetha em em zel thung. Game tinah save hi 4.5 neih ziah ang a ni a. Arsenal si nghal David Raya erawh chuan game tinah 1.8 save nei ziah ang a ni thung. He tehna hi Golden Glove dawng tur thlanna ang erawh a ni lo. Golden Glove dawng tur thlannaah chuan Clean sheet a pawimawh bera hemi tehnaah hi chuan Martinez hian Chelsea a zawm hnuin clean sheet a la nei lo thung.
Jeremy Jacquet (GB – 7.72/10)
Liverpool in July thlaah £60m senga an lak luh Jeremy Jacquet hi an la lut fuh cher cher hle. Reds defender rinrawl ni thin Ibrahim Kanote chuan Real Madrid a pan a, hliam vangin Giovanni Leonia inlan thei lo bawk. Hei vang hian kum 21 mi Jacquet hian a club thar tan khelhna hmun a chang nghal. Tlarhnungah tawnhriat nghah Virgil van Dijk nen an inkawp a, an inkawp fuh cher cher hle. Van Dijk nen an inkawp hian an khelh hnuhnung vawi thumah clean sheet an neihpui hial a. Hei hi kum hnih chhunga a thlen vawi khatna a ni hial nghe nghe. Jacquet hian ball inchuh (deul) ah 76% zet chak zawk a ni.
Jan Paul van Hecke (GB – 7.62/10)
Tottenham Hotspurs in Brighton atanga an lak Jan Paul van Hecke hi an la fuh viau. EPL 2026-27 a match nga an khelh tawhah defender chetha ber leh langsar ber ber zingah a tel.
Tottenham hi season liam taah an talbuai a, season kal mekah pawh an buai chhunzawm. Table hnuai ber an luah mek a hei hi kum 2008-09 hnu lama table hnuai ber an luan vawi khatna a ni. Team angin talbuai viau mah se Van Hecke erawh mimal takin a khel tha em em thung. Season kal mekah a club thar Tottenham tan a la khel kim vek a ni.
Granit Xhaka (DM – 7.66/10)
Kum 33 mi lai ni tawh mah se Xhaka hi a la tar mawlh lova, league harsa Premier League-ah meuh pawh a la chetha hle thei tho mai.
Sunderland captain Xhaka hian Xhaka season kal mekah goal thun theihna hun tha bik vawi nga a siam tawh a, game tinah 1.2 interception leh 1.8 tackle nei ziah ang niin ball chhuh let leh game tinah 6.6 nei ziah ang a nih bakah 67% zet an khingpuite a thaibum a, ball inchuhah 60% zet chak zawk a ni bawk.
Martin Odegaard (CAM – 7.60/10)
World Cup 2026-ah hmuhnawm taka a inlan hnuin Arsenal captain Martin Odegaard hi EPL 2026-27-ah tha leh hmuhnawm zual zawkin a inlan a, Arsenal game khai dingtu pawimawh tak a ni.
Odegaard hian Coventry City leh Cheslea lakah goal a thun a, game tinah 1.4 shot nei ziah ang niin a hun tha neih goal-a a chantir zat hi 29% a ni. Hetihlai hian season kal meka ball a pass dik zat chu 91% daih a ni thung. Heng bakah hian game tinah 2.4 ball chhuh let zel ang a ni tel bawk. Mualchhungah nuamti taka a inlan hi hmuh a nuam a, a thiamna leh inpekna hmanga team a kaihruai tha em em zel hi Odegaard ti hlu leh zualtu a ni.
Morgan Rogers (CAM – 7.68/10)
Chelsea chuan £117million zet sengin Aston Villa leh England midfielder Morgan Rogers an la lut. Sum an seng huai bawk a, an seng sual lo. Rodger hian a club thar Chelsea tan vawi nga khel tawhin goal thum ngawt a thun a, assist vawi hnih a nei tawh bawk a, season kal meka chetha ber zinga mi a ni.
Arsenal pawhin an squad thuam chak tura an duh em em Morgan Rodgers hian Chelsea tan EPL season kal mekah game tina minute 88 khel ziah ang a ni a, ball a pek dik zat hi 75% – 80% a ni a, tlarhma lamah a tal na viau chungin tlarhnung lam pawh a pui tha viau tho bawk a, game tinah vawi 4.6 zel ball chhuhsak zel ang a ni.
Chelsea hian manager thar Xabi Alonso hnuaiah an squad thuamchak hna an thawk nasa viau a, nipui bazarah sum pawh an seng hnem. Beisei angin la chetha lo mah se an player thar Emiliano Martinez leh Morgan Rogers te rawh an langsar viau tawh thung. (chhunzawm tur)
EPL 2026-27 a chetha zualte
