Premier League manager ni tawh zawng zawng zingah Jose Mourinho chu player lei nana sum seng hnem ber a ni. Manchester City manager Pep Guardiola chu manager zinga sum seng hnem pahnihna a ni a. Arsenal manager hlui Arsene Wenger chu player lei nana sum seng hnem zual pathum zingah a tel ve teh tlat.
Chelsea, Manchester United leh Tottenham manager ni tawh Jose Mourinho hian EPL club lian pathum a enkawl chhungin player 64 zet a la lut a. Player 64 lak luh nan £1,146,872,500 zet a seng. Manchester United a enkawl laiin Paul Pogba chu an club player manto ber ni turin a la lut a. Romelu Lukaku, Fred leh Nemanja Matic te lak luh nan sum a seng hnem leh viau bawk. Chelsea a enkawl laiin Andriy Shevchenko chu man to takin an lei a, an tifuh tehchiam lo. Manager luhlul Jose Mourinho hian EPL a club a enkawl zingah Tottenham chiah trophy a chawi pui lova, club dangah chuan manager tha a nihzia a lantir thei zel.
Jose Mourinho hian player pakhat lei nan £17,917,998 seng zel ang a ni a. Player pakhat lei nana sum hneng tam lamah pangana a ni.
EPL manager zingah player lak nana sum seng hnem ber Mourinho hnuai chiaha Manchester City manager Pep Guardiola a awm. Barcelona leh Bayern Munich manager hlui Pep Guardiola hian kum sarih zet Manchester City a enkawl chhungin player 43 a la lut tawhin player lak nan hian £1,052,911,658 zet a seng tawh a. Player pakhat lak nan £24,474,854 zel seng anga chhut a ni. Kum 2021 khan Aston Villa atangin England midfielder Jack Grealish chu £100m zet sengin a la lut a, Grealish hi City player manto ber a la ni reng.
Pep Guardiola hian player lak nan sum a seng hnem a, hlawhtlinna hrang hrang an chan miau vangin a sum sen a thlawn lova ngaih a ni. City hi English Premier League-ah vawi nga zet a champion pui tawh a. Champions League-ah vawi khat a champion pui bakah FA Cup-ah vawi hnih a champion pui tawh bawk. Season liam ta khan City hi tre-ble champion a nihpui hial a, hei hian a ropuina a belhchhan nasa hle. Guardiola hian player pakhat lei nan £24,474,854 zel seng ang a ni a, player pakhat lei nana sum seng hnem ber a ni thung.
EPL manager zinga player lei nana sum seng hnem pathumnaah Arsenal manager ropui Arsene Wenger a awm teh tlat. Wenger hian kum 22 zet Arsenal a enkawl chhungin player 84 lei a lei a, a sum sen zawng zawng hi £762,364,525 a ni a. Player pakhat manah £9,410,501 zel a seng anga chhut a ni a, manto taka player lei chiam chi a ni lo tih erawh a hriat theih. Arsenal a enkawl chhunga a player lei to ber chu Pierre-Emerick Aubameyang a ni.
Player lei nan sum seng hnem palina chu Liverpool manager Jurgen Klopp a ni a, kum riat chhung Liverpool a enkawl chhungin player 26 a la lut tawh. Klopp-a player lei to ber chu Darwin Nunez a ni a. Benfica atanga Nunez lak nan £84million zet a seng. Reds-a a lak luh langsar zingah defender tha tak Virgil van Dijk a tel a. Van Dijk hi Southampton atangin a la a, a lak nan £75m zet an seng. Klopp hian player lei nan sum £613,012,866 zet a seng tawh a. Player pakhat lei nana sum seng hnem pathumna a ni thung a, player pakhat manah £23,577,417 zel seng ang an ni.
Klopp hian nipui bazar inhawng mekah Alexis Mac Allister leh Dominik Szoboszlai te a la lut fel tawh a, sum an seng leh nual tawh. An midfielder pahnih; Jordan Henderson leh Fabinho ten Saudi Arabia an pan vangin an hmunruak luahtu tur lak luh ngei an la ngai dawn bawk.
Premier League-a manager ropui ber ang hiala ngaih Sir Alex Ferguson khan United a enkawl chhungin player 52 a la lut hman a, player lei nana an sum sen zawng zawng hi £570,460,410 a ni a, player pakhat lei nan £10,968,645 zel seng ang an ni a. An hun lai khan player an la to uchuak lutuk lo bawka player pakhat lei nan sum hlawm lian an seng vak lo. Sir Alex hi player pakhat lei nana sum seng hnem 10 zingah pasarihna daih a ni a. A hnuai chiahah hian Arsenal manager Arsene Wenger a awm nghe nghe. Sir Alex-a chungah hian Brendan Rodgers a awm teh tlat a, Rodgers hian player lak nan £591,863,280 zet a seng tawh.
EPL manager zinga player lak nana sum seng hnem zual sawm zingah hian Manuel Pelligrini (£526,525,663), Mark Hughes (£513,571,470), Antonio Conte (£511,206,447) leh Eddie Howe (£481,754,136) te an awm
EPL manager zinga sum seng hnem ber Mourinho
