John Lennon kutziak ngei, band thar a din tura Erci Clapton tel ve tura a sawmna lehkhathawn, phek riat lai mai chu an lilam dawn a, dollar 1,50,000 chuanga hralh theih an inbeisei.
He lehkhathawn hi September ni 29, 1971-a John Lennon ziah, Clapton hnena a lehkhathawn tur a ziah hmasak chhin (draft) niin, hemi kumah vek hian Clapton hnenah Lennon hian hetiang lehkhathawn chiah tho hi a thawn ta a ni. A lilamna hi International Autograph Auctions Europe SL-in an kalpui dawn a, December ni 5-ah lilamna hi an nei dawn a, tunah hian a chhang duh te tan registration a tih theih tawh.
A lehkhathawn bul tannaah Lennon chuan, “Yoko (a nupui) nen i music leh nangmah hi kan dah sang hle che tih i hre tawh ngei ang a,” tia bul tanin, chutah Clapton-a’n hun a harsa a tawh lai sawi chhuakin, an pahnihin rimawi ropui tak an tichhuak thei ngei dawna a hriat te a ziak zui ta zel a, mahse, Clapton hian Lennon-a sawmna hi a hnar ta zawk a ni.
Draft letter a ni bawka ziah that leh thaichhiat a tam hle a, Lennon hian Clapton hnena a lehkhathawn tak takah engtiang chiahin nge a ziah tih chu a hriat tawh loh a, mahse, heta a draft nen a danglam vak lo turah an ngai a ni.
Eric Clapton hnena John Lennon lehkhatawn an lilam dawn
