Daily Newspaper

Eriksen endik dawn

12

Euro 2020 an hma-chhawn hmasak berah lungphuchawl a boral tep Christian Eriksen chu Inter Milan-ah a let leh dawn a. Karlehah a hriselna endik a ni ang a; football khel leh thei tur chi a ni em tihchian a ni dawn.

Euro 2020-ah Denmark in Finland an hma-chhawn a, chawlhlawk dawn hnaihah vanduaina a thleng. Denmark captain leh an thiampuipa Christian Eriksen chu lunglam tha lo (cardiac arrest) vangin khelhmual chhungah ni khaw hre lovin a tlu. Eriksen hi a dinhmun a tha lo hman hle a, rang taka CPR pek niin, mihring a tling zo tawh lo emaw tih a ni hman hial. Vanneihthlak takin a thachhuak leh hlauh a, Denmark in semi-final an khelh dawn meuh chuan a team te a tlawh leh thei tawh. Beisei phak bakin hma a sawn chak a, football a khelh leh theih mai beiseina a piang zui leh nghal.

Italian Serie A champion Inter Milan chuan an midfielder hi karleh khian a hriselna an endik dawn a. An endik result hian a hma lam hun tur a hril chiang thei dawn. An endikna hnuin football a khel leh thei ang em tih zawhna awm mek chu chhanin a awm tawh dawn a ni.

Midfielder ball thiam zet mai Christian Eriksen hian London club lian Tottenham Hotspurs tan vawi 300 chuang zet a khel hman a. Kum ruk leh a chanve chhung zet a chamchilh hnuin Italy club lian Inter Milan a pan. Inter Milan-ah hian beisei a phak lo thung a, Premier League-a a lansarh angin a langsar thei tawk lo. Inter Milan tan hian inelna hrang hrang ah vawi 60 a khel tling hman a, season liam ta khan Italian Serie A-ah a champion pui. Kum 29 mi lek ni chungin van-duaina a tawk a, football a khel leh thei tawh dawn a nih chuan a uiawm hle ngei ang.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy