EU-in an terrorist list-ah Iran-a IRGC dah thar

EU-in an terrorist list-ah Iran-a IRGC dah thar
European Union (EU) chuan Iran-a Islamic Revolutionary Guard Corps (IRGC) chu tun hnaia an rama mipuiin lungawi lohna an lantirna tharuma rawng taka an beih chhan let nan an terrorist list-ah an telh thar.
“Mi an neksawrna hi chhan let loh theih a ni lo,” tiin an palai lawk, Kaja Kallas-i chuan a sawi a. Iran-a sipai, eibar leh politic sipai pawl chak tak, IRGC hi al-Qaeda leh Islamic State anga jihadist pawl anga chhiar turin a rawt a ni.
Iranian Foreign Minister Abbas Araghchi-a chuan EU thutlukna chu ‘thil tihsual lian tak’ a nih thu a sawi nghal.
Mihring dikna chanvo humhalhtute chuan December leh January thlaa Iran-a mipui lungawi loh lantirnaah khan IRGC telin, venhim hna thawktuten mi sang tel an that niin an sawi a ni.
Brussels-ah Ningani khan French Foreign Minister Jean-Noel Barrot-a chuan ‘tun lai Iran chanchina mi rahbehna rawng ber’ tia sawiin ‘dan bawhchhiatna siam chu ngaihzam theih a ni lo’ tih a sawi.
France hi a hma chuan Iran nena an inpalaina a tawp mai hlauh vanga EU terror list-a IRGC dah duh lotu langsar a ni thin a; mahse, Nilaini khan a ngaihdan thlakin Italy kaihhruaia firfiak pawla tel duhtute lam a tang ta a ni.
Kallas-i chuan terrorist list-ah IRGC telh mah se Iran nena an inpalai tawnna chu a la kal reng a beisei tih a sawi.
EU hian Interior Minister Eskandar Momeni, Prosecutor General Mohammad Movahedi Azad leh Presiding Judge Iman Afshari te telin mi mal 15 lakah hrekna a kalpui thar bawk.
“An vai hian muanawm taka lungawi lohna lantirtute tharuma mi nekchepna, political activist leh mihring dikna humtute mannaah an inhnamhnawih a ni,” tiin EU hian thu a chhuah.
EU-in terrorist list-a a telhte hi hrekna a ni a, zin leh an thil neih khawih chet theih lohva dahna niin hei hi an thawhpui pawl dangte nena an inpawh theih loh nana tih a ni.
Iran-a sipai pawl thil tithei ber, IRGC hi 1979 hnu lawka an rama Islamic system vawng him tura din an ni a. Sipai 1,90,000 awmin khawmual, boruak leh tuipuia che thei an ni a, an ralthuam sawngbawlah pawh thuneihna thui tak an nei.
Australia, Canada leh US chuan IRGC hi firfiak pawlah an lo chhal tawh bawk.
EU-in thu thar a neih hma lawk hian US President Donald Trump-a chuan a sipai rualten Iran an pan a. Iran nena nuclear programme-a indawr turin hun a liam tawh tih a sawi.
Inremna an neih loh chuan nikuma an beih ‘aia nasa fein’ an bei dawn tih a sawi bawk.
Iranian foreign minister pawhin an sipaite chu silai hmet puak turin an inring reng a, an ram beihna chu ‘rang leh na takin’ an chhang let dawn tih a sawi ve bawk.