Daily Newspaper

Europa League 2020-21 thlir kualna

14

Football ram ropui tak tak awm khawmna Europe khawmualah khuan football-a an thu neitu sang chu The Union of European Football Associations (UEFA) a ni a. UEFA hnuaiah khawmual huapa football club hrang hrangte inelna ngaihhlut hlawh tak pahnih a awm a. Pakhat chu thawh leh zan leh nilai zana group stages an khelh zawh tak Champions League kha a ni. Champions League hi Europe khawmuala football club hrang hrangte inelna ngaihhlut hlawh ber leh sum pawh tam ber a ni. Champions League hi club tha ber ber, player tha rual kawl khawmtute inelna thin a ni deuh hawt a, khawela ennawm ropui ber, FIFA World ai pawhin a class a sang zawk fe an ti hial thin a. Europe-a club hrang hrangten an khelh chak ber chu champions League hi a ni. Champions league-a champion ngat phei chu an ngaihlu hle thin a. UCL a champion hi Football player te suangtuah ram luah lian bertu pakhat tling hial a ni.

Europe khawmuala football a thu neitu sang ber chu The Union of European Football Associations (UEFA) a ni a. UEFA hnuaiah hian football club te inelna ngaihhlut hlawh pahnih a awm. Pakhat zawk chu champions league a ni. Champions League hi club tha tak tak, mahni tualchhunga che tha ber berte inelna thin niin, player te khelh chak, champion an chak em em na a ni. Champions League hnuai chiaha mi chu Europa League a ni. Europa League hi Champions League ang em in ngaihhlut ni lo mahse, he inelnaa inlan phak tur pawh hian tualchhung inelnaah chetthat hle tho a ngaih vangin a tel phak nih pawh hi a thlakhelhawm hle tho thung. Europa League champion hi champions league khel turin an tling nghal a. Champions League champion team nen UEFA Super Cup-a inhmachhawn zui tur an nih bawk vangin a tel phak team ten champion an chak hle thin.

Europa League group stages khel phak team te hian Euro nuai 29 leh sing hnih an dawng phak vek a. Group match-a chak team te hian Euro nuai nga leh sing sarih an hlawh zel a, an inhnehtawk a nih chuan Euro nuai 1 leh singkua ve ve an dawng thin. Champion team hian Euro nuai 85 zet an hlawh a, pahnihna Euro nuai 45 an hlawhchhuak phak a. Sum tam tak leh hming thatna hlawhchhuak tur an nih vangin football club te tan ngaihhlut loh theih loh a ni.

Tuna Europa League ni ta hi kum Inter-Cities Fairs Cup tiin kum 1955 khan khelh tan a ni. Kha tihlaia FIFA vice-president Ernst Thommen te, Italian Football Federation President leh FIFA Executive Committee member ni bawk Ottorino Barassi leh English Football Association general secretary, kum 1961 atanga 1974 chhunga FIFA President Stanley Rous te ngaihtuahchhuah a ni. Kum 1955 atanga kum 1971 thleng khan Inter-Cities Fairs Cup hming a pu a. Kum 1971 atang khan UEFA in kut ken zui ta a, inelna kalphung siam thar niin, a hming pawh tih danglam a ni a, UEFA Cup tih a lo ni ta a ni. UEFA Cup tia a hming thlak a nih a, inelna awmze nei zawk kalpui a nih hnu hian English club pahnih Tottenham leh Wolverhampton Wonderers te chu final-a intum hmasa ber an ni a, London hmar veng club lian Tottenham hian UEFA Cup-a champion hmasa ber an ni ta a ni.

2008-2009 season thleng khan UEFA Cup hming ala pu a, 2009-10 atang khan tuna a hming UEFA Europa League hming hi puttir a ni ta a ni. UEFA Cup a nih lai leh UEFA Europa League a nih hnu thleng hian Spanish club lian Sevilla chu club hlawhtling ber an ni a, vawiruk an champion tawh. He inelnaah hian vawithum champion zawn thei hmasa ber leh awm chhun an an ni a. Champion tam lama pahnihna Inter Milan, Liverpool, Juventus leh Atletico Madrid te aiin vawi thum ngawtin an champion tam zawk a. Heng club lian pali Inter Milan, Liverpool, Juvents leh Atletico Madrid te hi vawithum theuh an champion tawh a ni. He inelnaah hian Spian team vawi 12 ngawt an champion tawh a, English team leh Italian team
te vawikua ve ve an champion tawh bawk.

Europa League group Stages -ah hian team 48 ten intihsiakna an hmachhawn a, last 32 luh phak tumin inelna hautak an hmachhawn. Club 48 te hi group 12, A-L-ah then hran an ni a, group khatah hian team li zel an awm. Group hrang hranga champion leh pahnihna te hian knockout round, last 32 tia sawi bawk an lut a. Pathumna leh palina te chuan an puanthuah an tel fel nghal zel thung. Team 48 zinga a chave 24 hnawhchhuah in an awm a. Champions League last 16 lut phak lo, an group-a pathumna theuhte team pariatte chu Europa League khel zui turin an tla thla a. Chung team pariatte nen chuan team 32 an lo ni leh ta a, chu chu last 32 kan tih kha a ni ta a ni.

Europa League group match hi zanin hian khelh zawh a ni dawn a. Zan dar 11:25 atangin inkhel hmuhnawm tak tak en tur a awm ang. Group match khelh mekah hian heng; group C, Group D, Group E, Group G, Group H, leh Group L te an inching fel tawh a, last 32 lut tur leh tla tur a chiang tawh. Group C atangin Slavia Prague leh Bayer Leverkusen ten last 32 an lut chiang tawh a. Anni hi pahnih hi group match hnuhnung berah an inhmachhawn dawn a, group champion nih an inchuh dawn a, inkhel pawimawh tak a ni ngei dawn. An inhnehtawk a nih chuan Slavia Prague hi group champion an ni zui thung ang.

Group D atangin Liverpool player ropui ni thin Steven Gerrard-a enkawl Rangers leh Portugal club lian Benfica ten point 11 ve ve hmuin last 32 an lut ve ve tawh a. Group champion nih tumin inelna an hmachhawn zui leh ang. Group E atangin Granada leh PSV Eindhoven ten last 16 an lut chiang tawh a. Group G atangin Premier League club Leicester City leh Braga ten point 10 ve ve hmuin last 16 an lut chiang dun tawh a, an ni pawh hian group champion nih an inchuh zui leh dawn. Group H atangin Lille leh AC Mila an tlang chiang tawh a. Zanin hian group champion nih an inchuh zui ve bawk ang. Group L atangin Aizawl Lammualah pawh lo inkhel tawh TSG Hoffenheim leh Red Star Belgrade ten last 16 an lut chiang tawh a, Hoffenheim hi group champion an ni a, Red Star Belgrade hi pahnihna an ni.

Group J pawh hi an inching fel a ni deuh ber tawh. Hmahruaitu Antwerp chuan last 16 an lut chiang tawh a. Premier League-a hmahruai mektu Tottenham chuan chu pahnihna ni mek in, pathumna LASK Linz in point-ah la um phak thei bawk mahse goal difference-ah an phak thei tawh lo ang ngaih ngam a ni tawh thung..

An awmna group la inching fel lo mahse heng team hrang hrang, AS Roma, Arsenal, Villareal leh Dinamo Zagreb ten last 32 an lut chiang tawh.

Italian Serie A club lian AS Roma chuan Group A lamah ro an rel a, vawinga khel tawhin tlawm an a nei lova, vawili an chak a, vawikhat an khingpuite en an inhnehtawk a, point 13 hmuin group champion niin, an hnuai chiaha awm Young Boys nen an inkarah point ruk a zep a tla zep tawh. Roma hian an khingpuite lakah goal 12 zet an thun a, goal hnih chiah an la chhuah thung. Point 7 hmu mek Young Boys leh point nga hmu mek CFR Cluj-Napoca ten last 32 luh an inchuh zui ang. Young Boys hian an hnuai chiaha awm CFR Cluj-Napoca hi an mikhual dawn vangin last 32 luh theihna hun tha tak an nei a ngaih a ni. An mualah point khat an hlawhchhuak thei a nih chuan last 32 an lut ang a, mikhual team CFR Cluj-Napoca tan last 32 lut turin chak ngei ngei a ngai thung ang.

Group B lamah Premier League-a che chhe tak, 15-na ni mek Arsenal an chungnung fal hle thung. Gunners hian vawinga khel tawhin an la chak vek a, point hmuh theih zawng zawng an la hmu fai vek. An khingpuite lakah goal 16 zet an thun laiin, goal thum chauh an la chhuah. Pahnihna ni mek Molde nen an inkarah point ruk zet a tla zep tawh a. An match hnu hnung bera Dundalk an hmachhawn hunah si 30 leh bial in tlawm tehreng pawh nise last 32 an lut tawh tho tho a ni. Arsenal manager Mikel Arteta chuan Europa League hi player naupang zawkte chhawr nan a hmang a. An che vel a hmuhnawm in, mit an la hle a. Khelhna chhung chak zawn phuin an inlan tih phat thu a cheng lo a ni. Group B-ah hian Norway club Molde chuan point kua hmuin pahnihna an luah a, point 6 hmu mek Rapid Vienna nen inhmachhawn in, last 32 luh an inchuh zui dawn a, inkhel pawimawh hmachhawn in, fiahna hautak an hmachhawn zui a ngai dawn a ni.

A hma lama kan sawi tawh angin group C atangin Slavia Prague leh Bayer Leverkusen ten last 32 an lut chiang tawh a, Ligue 1 club Nice leh Israel club Hapoel Be’er te an tla chiang tawh. Slavia Prague mualah si khat faiin Bayer Leverkusen hi an tlawm tawh a. Zanina an inhmachhawn hunah German club hian an mualah hneh let in, last 32 luh ngei an tum hle tura ngaih a ni.

Team lian Roma, Arsenal leh Villa Real ten an khelh that em em laiin AC Milan, Tottenham, Napoli leh Leicester City ten beisei anga thain an khelchhuak rih lo thung. Italian Serie A lama hmahruai mektu AC Milan hian Group H lamah pahnihna an luah mek a, vawinga an khelh tawh atangin vawithum an chak a, vawikhat tlawm in, vawikhat dang an khingpuite nen an inhnehtawk. An khingpuite lakah goal 11 chiah an thun a, goal 7 lai an chhuah tawh thung. Last 32 lut tawh tho mahse chetha tia sawi tur erawh an ni lo.

Premier League hmahruaitu, 2019 champions League finalist Tottenham chu awlsam taka thlang mai thei tura ngaih an nih laiin an kawng a awlsam bik lo. Spurs hi Group J-ah an awm mek a, last 32 lut chiang tawh a ngaih erawh an ni. An group-ah hian Antwerp, LASK Linz leh Ludogorets Razgrad te an awm a. An elpuite en hian pahniha awm tura ngaih an ni lo. London hmar veng club lian hian vawinga khel tawhin, vawithum an chak a, vawikhat tlawm in, vawikhat dawn an khingpuite nen an inhnehtawk. An khingpui lakah goal 13 an thun a, goal nga an chhuah tawh thung.

Group F hi Group ngaihnawm ber a ni ta hial a, Serie A club lian Napoli, La Liga lama pahnihna luah mektu Real Sociedad leh AZ Alkmaar te last 32 luh tumin an intlansiak mek. Anni pathum zinga pahnih hian last 32 an lut ang a, pakhat hi chu an tla hang nalh thung ang. Hmahruaitu Napoli hian an hnuai chiaha awm Real Sociedad hi an mikhual dawn vangin an tan last 32 luh theihna kawng zau takin a inhawng a ngaih a ni. Last 32 lut turin point khat an mamawh a, an mualah an chak zo lo a nih pawhin, tlawm loh hram an tum ang. Napoli mualah Real Sociedad an chak zo lo a nih a, AZ Alkmaar in khualmualah table mawngphah Rijeka an hneh a nih chuan Netherland club tan last 32 luh theihna kawng zau takin a inhawng a. Napoli an chak a nih phei chuan Netherland club tan last 32 lut turin draw a tawk thei dawn a ni.

Europa League 2020-21 season – Group stages-ah hian inkhel vawi 120 zet a awm tawh a, goal 378 lut tawh in, inkhel tinah goal 3.15 lut ziah ang a ni a, goal ruk thun tawhtu Yusuf Yazici chu top scorer a ni mek. Covid 19 hripui vangin inkhel entu an tlem hle a. Match 120 zetah hian entu mipui 59,106 chauh an la awm a, match khatah entu mipui 493 awm zel ang chauh a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy