Daily Newspaper

Europe-a chak loh ngai thei lo Barcelona

6

Champions League Group G hmahruaitu Barcelona chuan Nilaini zanah sithum faiin mualneitu Ferencvárosi Torna Club an sawp leh a, ti hian, group stage match nga an khelh tawhah chak fai vekin, group hmahruaitu ni hlen thei turin hma hun eng tak an nei a, karleh hian anmahni hnaihbertu Juventus nen khelmualah tunge chung-nung zawk tih an chingfel dawn a, Serie A champion laka point khat an hlawhchhuah chuan group champion ni chungin knock out draw an nghak thei tawh ang.

Hungary rama fehchhuak Catalan giants goal thum hi first half chhunga lut vek niin, minute 14-na lekah Spanish left-back Jordi Alba siamsak atangin Antoine Griezmann chuan goal hmahruai a thun mai a, minute ruk a liam leh a, Frenchman Ousmane Dembele chhawpsak atangin Denmark forward Martin Braithwaite chuan mikhual goal hnihna a thawh ve leh a, he goal hi a game hnuhnung pathuma a goal li tihluhna a ni tawh nghe nghe.

Sihnih faia hma an hruai hnuah pawh Catalan giants-in an la duhtawk mai lo a, darkar chanve khelh tlin hma minute hnih la awmah Abraham Frimpong laka Braithwaite-a hlawhchhuah penalty atangin French winger Dembele chuan La Liga club goal thumna leh he inkhela goal lut hnuhnungber ni zui ta a chhuihlut a, an mikhualna ramah nuamsain Barca an chak.

Coach Ronald Koeman chuan Pathianni league match-a Osasuna an hneh tuma luthmasa panga awltirin, a chawlhhahdamtir zingah captain Lionel Messi pawh a tel nghe nghe a, kum 33 mi Argentine uapna tel lo pawhin Catalan team-in Budapest khawpuiah harsatna an nei lo.

Barca boss Koeman chuan a naute’n an khel tha ve hrim hrim niin a sawi a, an goal thunte leh goal ropui tling thiau nia sawiin, a bik takin first half-a an khelh danah a hlim hle tih a sawi a, player engemawzat awltir chung pawha squad ropui phawrh tur la nei cheu club an nih thu leh tlarhma lamah a bik takin an duai lo takzet tih chhuang takin a sawi.

Champions League match nga an chakzawnna inkhelah Barce-lona-in a khelhah pawh, goal-ah pawh mualneitu Ferencvaros an rapbet hneh hle a, group hma-hruaitu ni hlen turin dinhmun tha takah an ding.

Messi chuan a zawna a vawi-hnihna atan Europe-ah zin-chhuah a pumpelh a, tarlan tak angin, an captain awm loh hi an tuar lo khawp mai a; Argentine bakah hian an star player dang Philippe Coutinho leh first-choice keeper Marc-Andre ter Stegen-te paw’n in lum atangin an pawlte inkhel an thlir a, heti chung hian player naupang rual leh tawnhriat tlachham Hunga-rian-ho lakah first half minute 28 chhungin sithum faiin hma an hruai val val hman a ni.

Ronald Koeman-a team khan second half-ah pawh inkhel an la thunun chhunzawm zel a, mahse, Dembele chuan vawi-thum ngawt a hun tha neih a bawhpelh a, Miralem Pjanic pawhin teuh deuhin a thelh ve bawk!

Catalan team hian inelna hrang hranga an game hnuhnung pathumah hnehna an chang fai vek a, he’ng an chakna game thumah hian goal 11 zet an thun tling lehnghal a, tlarhma lama harsatna an tawk lo hian tualchhung leh Europe lamah hmalam hun beiseina eng a siamsak ngeiin a rinawm.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy