Daily Newspaper

Europe-a player tha ber Lewandowski

19

Bayern Munich striker Robert Lewandowski chuan Ningani khan Uefa men’s Player of the Year 2019-20 award dawngin, he chawimawina dawng thei tura chhawpchhuah ve dang Manchester City star Kevin De Bruyne leh Bayern goalkeeper Manuel Neuer a hmakhalh.

Polish forward hian Bavarians-in Champions League title paruk an lak tlinna kawngah khan goal 15 thawhin, final an khelh hma zawng khan match tinah goal a khung vek a, group game pakhata Tottenham Hotspur an khelh tumin chawlhhahdamtir a ni thung.

Season liamta khan Bundesliga match 31-ah goal 34 thun tlingin, German Cup game ngaah goal ruk a thawh tling bawk a, he competition pahnihah hian a champion-pui nghe nghe a ni.

German champion Bayern Munich manager Hansi Flick chuan Uefa coach of the year award dawngin, season liamtaa Wolfsburg tana khel, tun season-a Chelsea thuam inbel ta Pernille Harder kutah Women’s Player of the Year award a lut a, he award hi a tumhnih dawnna a ni nghe nghe.

Robert Lewandowski lamah kirleh ila. Bayern Munich forward hian goal a thun theih mai piahlamah thiante goal khung tur pawh a siamsak thei hle a, season liamta khan Champions League game 10 a khelh atangin assist vawiruk ngawt a nei tling.

Poland striker hi tunah kum 32 mi ni tawhin, season liamta khan inelna hrang hrangah belhkhawmin game 47 a khel tling a, chuti zat game atang chuan goal 55 puitlinin, Bayern chu Champions League, Bundesliga leh German Cup-ah a champion-pui.

Kum 29 mi Manchester City playmaker De Bruyne chu Champions League midfielder of the year atan thlanchhuah niin, Bayern lamin mipa award awm thei zawng zawng an hui kim vek tur a dangchat thei hram a ni!

Belgium midfielder hian September thla khan Professional Footballers’ Association men’s Players’ Player of the Year award a lo dawng tawh bawk.

Kum 34 mi Neuer kutah goalkeeper of the year hlan niin, Germany number one hian season liamta Champions League-ah match ruk goal a chhuah loh a nei a, August thla final-a Paris St-Germain an hnehna kawngah a thawhhlawk leh.

Bayern player dang kum 25 mi Joshua Kimmich pawh best defender atan thlan a ni ve bawk.

Coach tha ber atana thlanchhuah Flick chuan award dawng tura chhawpchhuah ve dang Liverpool manager Jurgen Klopp leh RB Leipzig boss Julian Nagelsmann-te a hmakhalh a, Reds kuta kum 30 chhunga a vawikhatna atana Premier League title chhungluttu Klopp hmakhalh thei Flick hi a record a la tha zawk tlat a ni.

Kum 55 mi Flick hian Niko Kovac an ban hnu nikum November thla khan Bayern assistant coach nihna atangin head coach a kai chho a, a hlawhtling zui ta hle a ni.

Chelsea leh Ivory Coast striker hlui Didier Drogba chuan khelmual chhung leh pawna football tana a thawhhl^wk avangin Uefa President’s Award chu Aleksander Ceferin kut atangin a dawng ve bawk.

Uefa awards hi Geneva khawpuia Champions League group stage draw rualin puan leh sem a ni a, coronavirus pandemic avangin club official-te an tel thei lo.

Player of the year thlangtute hi nikuma European competition pahnih khel club atanga coach 80-te bakah journalist thlanchhuah bik 55-te an ni a, chanchin-bumite hi Uefa member association ram atangin pakhat zel thurchhuah an ni.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy