Daily Newspaper

Europe champion – Bayern Munich

8

Pathianni zan, zanlaiah khan Europe khawmuala football club te inelna ngaihlut hlawh leh sum tamna ber; UEFA Champions League khelh zawh a ni a. ‘Dream final’ ah Bayern Munich chuan si khat faia chakin hnehna an chang a, a vawiruk nan UCL-ah an champion.

Inkhel hmuhnawm
Estádio da Luz stadium-a final khel Bayern Munich leh Paris St-Germain te hi tualchhung leh Europe-a chetha ve ve an ni a, trophy pahnih chawi tawh ve ve an nih bakah Champions League-ah group match atanga tlawm nei miah lo ve ve an ni bawk. Player an nei tha a, team lian leh hausa ve ve an nih vangin final-a an intum tur hian boruak a nei lian hle a, football ngainatute chuan ‘final duhthusam’ ti hiala an sawi a ni nghe nghe a ni.

Rinlawk ang ngeiin UCL final hi a tir atangin a hmuhnawm a, team hnihte an innawr tawk a, an inngam tawk viau bawk. German champion Bayern Munich an thawhhona a tha a, an inman a, ball a inpekual vel a hmuhnawm thei hle. Chawlhlawk hmangin Lewandoski chuan goal a thun teuh thei hle a, goal post a tih ber bakah si nghak Navas-a’n a dansak hlauh bawk. PSG pawhin goal thun theihna hun tha an insiamchhuah thin a, Germany si nghak Manuel Nuer a chetha leh pek hle a, a kut hmanga a dan theih loh pawh a ke hmangin tha zetin a dansak leh mai thin a, a team a chhanhim fo. Inkhel class sang takah hian chawlhlawk hmain goal lut a awm thei lo phawt.

Chawlhlawk hnu lamah German champion Bayern Munich in an khel tha leh zual a, an hmuhnawm leh zual sawt a, goal pawh an thun har lo. |ha taka ball a inpekkual hnuah ding lam sir atanga ball vawr luh tha tak chu PSG player hlui Kingsley Coman chuan far post-ah tha zetin a tauh lut a, hmahruaina goal a thun ta nge nge. Bayern in goal an thun hnuin an khel tha sauh a, ball a chang tam sawt hle. A vawikhat nan champion an tum luatah PSG an tangulh ve thung a, awmze neiin a khel chhuak hleithei meuh tawh lo. Hun tawp dawn hnaihah goal an thun teuh hle a, an vanduai a siamin an huntha neih an chhawr tangkai zo lova, Kylian Mbappe-a’n penalty a hlawhchhuak lo a uiawm hle bawk.

Bayern pawh hian ball chang tamin, a khingpuite thunun mahse goal dang an thun belh thei bik lova, 1-0 a hnehna changin phu takin an champion a, a vawihnih nan tre-ble champion an ni leh ta chiah bawk.

Champion thar Bayern Munich hi UCL-ah vawiruk an champion na niin Liverpool champion zat an nih rual a, an ni aia champion hnem pahnih; AC Milan leh Real Madrid te an la awm. Bayern hian UCL record thar an siam a, season khat chhunga UCL-ah tlawm nei miah lova kaltluang a, chak vek awm chhun an ni. Bayern Munich hian UCL-ah goal 500 an thun tling ta chiah a, UCL-a goal 500 thun tling thei pathumna niin an chungah hian Barcelona (517) leh Real Madrid (567) te an awm.

PSG si nghak Keylor Navas khan a team te hnehna chanpui zo lo mahse hnuhma tha tak a hnutchhiah a, si nghak zingah team hrang pahnih tan UCL final khel thei pathumna a ni a, a hmaah hian Hans-Jorg Butt (Bayern Munich & Bayer Leverkusen) leh Edwin van der Sar (Man Utd & Ajax) te an awm a ni.

Tuchel chungah Flick
Champions League final chinah chuan player tha tak takte an inlan tawh a, vawikhat tih fuh a chakpui theih a, tihsual neih zeuh a tlakpui theih bawk a, thluakna indon-aah manager te an pawimawh hle. 2019-20 UCL final-a manager indonaah Thomas Tuchel chuan Bayern Munich manager Hansi Flick a la khan lo deuh tih a hriat theih.

Hansi Flick hian semi final-a a chhawr loh Kingsley Koman chu bul a tantir a, chakna goal thuntu-ah a tang. Tlar-hnung veng ru tak siin an khingpuite an nawr thiam viau a, an lamah ball an inpekual an inpekual a, an lehlam an hawi chiahin an hlauhawm zui nghal fo thin. Hun tawp dawn hnaiah Philippe Coutinho leh Ivan Perisic te a luhtirin awmzia a nei a, boruak an siam hle.

PSG boss Tuchel erawh chuan Neymar leh Mbappe te a dah pawimawh lutuk a, a chetsual phah niin a hriat ve thung. Goal thun hmasak mamawh PSG hi an vanduai a, uiawm tak takin an thelh. An thelh fo laia Bayern in goal an thun chiah khan an player pawimawh Neymar leh Mbappe te chak tum lutuk an tangulh niin a lang tlat. Goal an chhuah hnu hian Neymar a khelin awmzia a nei tam tawh lo hle. Bench-ah Mouro Icardi te an la awm laiin khel tha tawh lo Neymar leh Mbappe te thlak a tum lo kha a tihsual niin a lang a, Icardi leh midang luhtir ta se..awmzia a awm phah viau mai thei.

A khai khawmnaah chuan chak phu zawk an chak a, team tha ber Bayern Munich an champion a tih ngam awm e.

Fak hlawh Flick
Bundesliga, German Pokal DF leh Champions League-a Bayern Munich champion puitu Hansi Flick hi fak loh theih a ni lo. Kum 55 mi Flick hian November 2019 khan Niko Kovac thlakin Bayern hi a enkawl tan. Hetihlai hian Bayern Munich hi an chetha lo hle a, Bundesliga-ah talbuaiin, champion zo tawh lo tura ngaih an ni hman hial. An talbuai vanga manager Niko Kovac ban an ni bawk. Flick-a’n Bayern a enkawl hnuin hma an sawn ta zawt zawt thung a, phurna leh inrintawkna sang tak an nei let leh. Inelna hrang hrangah an chak pawp pawp a, a vawiriat nan Bundes Liga-ah an champion a, German Pokal DF-ah Bayer Leverkusen hnehin an champion zui leh a. Europe-a inelna ngaihhluthlawh ber Champions League-ah hian phu, sawibuai theih miah lovin a champion pui leh ta zel a ni.

Europe-a football team tha ber Bayern Munich kan fak dawn a nih chuan a siam liantu Hansi Flick chanchin hi sawi hmaih thiang lo a ni a, fak loh theih loh a ni.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy