Daily Newspaper

Europe khwmualpuiah hripui leng zual zel

17

Europe khawmualpuiah coronavirus leng a hluar leh zual hloe a, hei vang hian khuahkhirhna thar hrang hrang kalpui leh niin health expert te chuan bosster vaccine pek a nih theih nan rawtna an siam bawk.

Slovakia, Czech Republic, Netherlands leh Hungary-ah te hripui kaithar record siam mek zel niin thlasikin a nuai dawn tawh avang leh inchhunga tawm nasat lai a nih dawn avangin Covid-19 inkaichhawn nasa zawka a pun theih lai a ni bawk.

Kar kalta khan America khawmualpuiah pawh hripui kaithar an pung nasa hle a, a bik takin North Amercia lamah a ni nasa zual a ni.

Central China-a kum hnih kaltaa Covid-19 len tan atangin kum hnih chhung chu khawvel a tuam tawh a, mi maktaduai 258 chuangin kai tawhin maktaduai 5.4 ten nunna an chan phah tawh a ni.

EU public health agency, European Centre for Disease Prevention and Control (ECDC) te chuan puitling tin te tan vaccine booster pek ni se a ti a, a bik takin kum 40 chin chunglam ngaih pawimawh hmasak tur a ti bawk.

“Israel leh UK data kan neih atangin booster dose chuan natna in a khawih nat lutuk theihna lakah a veng tih kan hrefiah a ni,” tiin ECDC te chuan an sawi.

EU ram thahnem tak te chuan booster dose an pechhuak sa tawh a, mahse, tehna an siam leh booster dose an pek dan a inang lo thung.

ECDC heaf Andrea Ammon chuan booster dose chuan immunity tlahniam zelah hripui kai theihna lakah a veng thei a, hei mai bakah hian hripui a nawlpuia inkaichhawn awm thei lakah veng dawn bawkiin damdawi In panpui ngai leh nunna chan te an tlem phah ang a ti.

Ram thenkhat vaccine pek kalpui muang te chu chak taka vaccine pek kalpui tura ngenin ruahmanna an siam te zawm a nih loh chuan December leh January thlaah Europe ah hripui avanga nunna chan an pun nasat tur thu a sawi bawk.

World Health Organization chief Tedros Adhanom Ghebreyesus chuan Europe chu pandemic epicentre a nih leh mek thu sawiin vaccine-in min humhim tia pawng fimkhurlohna nei lo turin a ngen bawk a. “Khawi ram mah fihlim an la awm lo,” tia sawiin karleha World Trade Organization ministerial meeting neih hunah pandemic vaccine a IP waiver chungchangah inremna an neih theih a beisei thu a sawi bawk.

Sweden chuan puitling, sorkar leh health officials te hnenah booster dose a pek vek tur thu a puang bawk a. mRNA vaccine booster shot chu kum 65 chin chunglamte hnenah pek hmasak phawt tur niin chumi hnuah age group dangte hnenah pek chhunzawm zel tur a ni bawk.

“Thlasik chiang lo tak kan hmachhawn dawn mek a ni,” tiin Health Minister Lena Hallengren chuan a sawi a. “I damlo a nih chuan Inah awm la midang i pui a ni mai a, vaccine la bawk a, pek che a rem hunah booster dose i la bawk dawn a nia,” tiin a sawi bawk.

Nilaini khan Slovakia chuan nikhata hripui kai tam ber ni a tawng bawk a, sorkar chuan karhnih chhung lockdown a puang zui dawn bawk a. Restaurants leh non-essential shop te chu khar vek tur a ni dawn a ni.

“Kan dinhmun a tha lo,” tia sawiin Prime Minister Eduard Heger chuan, “Tun dinhmun kan thlenna chhan hi ruahmanna siam te kan zawm that loh vang a ni,” tiin a sawi.

Austria chuan lockdown a kalpui mek a, Europe-a lockdown kalpui hmasa leh ber niin Czech Republic pawhin hripui kai hmuhchhuah tam ber ni tawngin nikhatah 25,000 chuang kai hmuhchuah a ni bawk a. Sorkar chuan kum 60 chin chunglamte chu vaccine laktir vek tumin hma a la zui bawk.

Netherlands-ah pawh hripui kai 23,700 hmuhchhuah niin pandemic len hnua kai hmuhchhuah tam ber a ni a, Zirtawpni atangin sorkar chuan khuahkhirhna thar a kalpui dawn bawk.

Russia-ah pawh coronavirus kaihhnawih avanga nunna chan nasa taka pungin hetih lai hian social network leh media website ah te chuan vaccine lak hlauhawmna nasa taka thehdarhin a awm thung.

Ningani atang khan France chuan khuahkhirhna thar a kalpui bawk a, Italy chuan vaccine la lote lakah khuahkhirhna thar kalpui bawkin cinema, restaurant leh sports events ah te December 6 atangin an kal ve a phal dawn lo bawk.

Khawvela vaccine pek thatna ber zinga tel Portugal chuan nakum January tawp lam atangin booster shot a pe leh dawn bawk a. Portugal-ah hian thla li chhunga hripui kai san ber tum a tawng mek bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy