Portuguese superstar Cristiano Ronaldo chuan Europe chhuahsanin Arab ramah football a pet tawh a; tunhnaiah football legend dang Lionel Messi pawh football level san berna Europe chhuah-sanin United States lamah Major League Super club Inter Miami chuan an lawmlut fel a; French forward Karim Benzema telin world class player uaithla lam eng-ngemawzatin Champions League khel lo tur zawngin Europe khawmualpui an chhuahsan ruih ruih bawk a, he boruakah hian Ronaldo a tawngchhuak a, Euro-pean football chuan a ‘quality’ a hloh then nasa tawh tih a sawi!
Nikum December thlaa Saudi Ara-bian club Al Nassr lama insawn ta Ronaldo chuan Arab team nena kum hnih leh a chanve daih tur contract an ziah hnuah Europe-a kirleh tumna a neih tawh loh thu sawi chiangin, top player-te’n Saudi team hrang hrang an zawm theihna’n kawng a dappui kal mek tih a sawi a, a khawsak mekna thlaler lalrama an league chu a elpui kumhlun Messi kalna MLS aiin a tha zawk tih a tarlang tel!
Manchester United nen an inthen hnua sum tam mangkheng hlawh tura desert kingdom pan ta Portugal captain chuan, “European football hian a quality thin kha a hloh nasa hle tawh a, tun thlenga la belhchiantlak leh la tha reng awmchhun chu (English) Premier League chiah hi a ni tawh. He league hi league dang zawng zawng chunga leng, hmahruaitu a ni,” a ti!
Tarlan tawh angin, Cristiano Ronaldo hian a tan Europe-a club football khelh lehna chance a awm tawh loh thu sawichiang nghalin, “European club-a ka kir tawh loh turzia hi 100% in a chiang, kum 38 ka tling tawh tlat,” tiin a kum enin letlehna hun remchang a awm tawh lo tih a sawi chiang.
Ronaldo hian Messi career-a bung thar a kaina Major League Soccer chu a hmu lian lo khawp mai a, Saudi Arabian league a tha zawk tiin a sawi sak sak!
Thawhtanni khan pre-season friendly match-ah Celta Vigo hneh loin Al Nassr chu singa fai ngawtin an tlawm a; match khelh zawh hian ESPN chuan Ronaldo kawmin, he hunah hian Portugal captain chuan Europe league zawng zawng tih theih deuh thaw chu a hniam zawngin an kal tih a hrilh!
Ronaldo chuan, “Saudi league hi MLS aiin a tha zawk. Tunah chuan player zawng zawngin he hmun zel hi an rawn pan ta a, kum khat han liam leh se top player tam zawkin Saudi Arabia hi an rawn pankhawm leh ang,” a ti.
Tarlan tawh thin angin, Saudi league-ah hian Real Madrid forward hlui leh Ballon d’Or winner ni bawk Benzema bakah N’Golo Kante hmuh tur awm bawkin, Chelsea atanga chhuak Kante hian Saudi champion Al-Ittihad a zawm thung.
European football quality tlahniam nasa – Ronaldo
