EU chuan energy resource leh maritime border chungchangah Greece laka ‘inrunralna leh nawrna’ a kalpui chhunzawm reng chuan Turkey chu an hrek mai tur thu a sawi.
European Commission President Ursula von der Leyen chuan Ankara chu eastern Mediterranean ah ‘a duh dan dana chet la lo’ turin a hrilh a.
A hma pawhin Turkey leh Greece te chuan helai region-a buaina a chhuah loh nan military hotline an siam bawk a.
He lai region-ah hian kumin kumtir lamah Turkey in lawng tirlutin oil leh gas te zawng turin a ti a, chu chuan ram pahnih inkarah inngurna a siam zui nghal ta a ni.
Von der Leyen chuan EU chuan Turkey nena inzawmna tha leh awmze nei tak neih a duha chu chu Ankara tan pawha pawimawh a nih thu a sawi a.
“Mahse, inrunralna leh innawrna tihtawp a nih chauha neih theih a ni,” tiin a sawi a. “Chuvangin, tun atang chuan Turkey chuan a duh dan dana chetlak a siam kan beisei a. Ankara in chetlakna a nei lui a nih chaun EU chuan hma a la ve tawh dawn a ni. Kan kalpui nghal mai theih tur hmanrua kan nei sa,” tiin a sawi bawk.
EU mmeber-te chuan Turkey chetlak dan chu December thlaah thlirhona neih leh rem an ti ta a ni.
Austrian Chancellor Sebastian Kurz chuan, “International law a kalh zui zel chuan EU in Turkey laka hreka vauna a pechhuak a ni,” tiin a sawi.
European Council President Charles Michel chuan EU chuan Turkey chu inzawmna tha tak neihpui a duh a, mahse chu mi hma chuan Mediterranean a chetlakna a neih a tihtawp a ngai a ni tiin a sawi bawk.
EU leh Turkey te hian inzawmna derthawng tak an nei a. Turkey hi EU member nih tuma hun rei tak hma la tawh niin mahse member atana pawm a la ni lo. EU leader te chuan dan an neihah Turkey-in human rights leh rule of law a record neih chu an sawisel ber a ni.
Member ni lo chungin Turkey chu EU thawhpui pawimawh tak ni thungin migrants maktaduai tel te EU a luh tum te lo mikhual reng tawhtu a ni bawk.
Greece leh Turkey hi Nato member ni ve ve an ni a, mahse, ramri leh tuipui ramri inchuha buai ve reng an ni bawk.
(THE AIZAWL POST – Rampawn)
Full>> ePaper Subscribe
