Mizoram sawrkar hna laka ex-servicemen tana hauhsak dan chungchangah Ex-Services League chu High Court-a kal an tum.
Mizoram Ex-Services League hian Inrinni khan Aizawlah general assembly vawi 34-na an hmang a. An thurel zingah “Mizoram sawrkar hnalaknaa ex-servicemen te reservation chungchang” tih chu High Court-ah petition thehluh nise an ti.
Chawhma lam hun hmanpuitu Home minister Lalchamliana chuan state sawrkarin ex-service te chu a duhsak thu leh, police an lak turah pawh seat zaa 5 an hauhsak thu te, Home Guard atanga Police-a lut turte tan pawh sawrkar chuan ngaihtuahna thui tak a sen tawh laiin, Covid hrilengin harsatna a siamsak thu te a sawi a. Sawrkar chuan hei hi tihlawhtling turin hmaa lak mek tih a sawi a ni.
Sipaia tan chu mahni, chhungkua leh khawtlang tan thil tha a ni, tih Home minister hian sawiin, sipaite hi ram leh hnam humhimtu an nihna piahlamah chhungkaw chawmtu leh khawtlang tan mi tangkai an ni a. Mizo zinga IAS leh sawrkar hna lian dang thawk zingah sipai fa an tam hle, tiin a sawi bawk.
He hunah hian Mizoram Ex-Services League president Lt.Col. Clement Lalhmingthanga leh Sainik Welfare & Resetlement director Srg.Lt. Cdr. Lalnuntluanga ten thu an sawi a ni.
Ex-Servicemen ten High Court kal tum
