Excise minister Er Lalrinawma’n ruihhlo do nan Mizoram Excise & Narcotics department te’n motor chak zawk an mamawh thu a sawi a, hmanraw tha zawk pawh an mamawh telh telh dawn niin a sawi.
Nilaini khan a demand sawihona hmawrbawkin minister hian ruihhlo dova tanlak a ngaih thu leh, inthuam thar a tul thu te a sawi a, “Motor chak zawk te hi kan mamawh hle a ni tih hi ka’n sawi duh a,” a ti.
“Ralthuam leh hmanraw changkang zawk te pawh hi kan mamawh telh telh dawn niin ka hria a,” a ti a, ruihhlo hmanga sumdawngte an lian telh telh thei tih sawiin, “Drug cartel hlauhawm tak tak pawh an la awm lo ang tih a sawih theih loh,” a ti.
Ruihhlo do kawngah theihpatawpa tanlak a ngai tih a sawi a, Mizoram sorkarin district leh village level-ah ruihhlo do committee a din thu leh chumi atan chuan sorkarin cheng vaibelchhe 3 a pek thu te a sawi.
A department chan dang AH&Vety department chungchangah, African Swine Fever vangin Mizoramin vawk 46208 a chan tih a sawi a, chhungkaw 2428 hnenah zangnadawmna pek a nih thu a sawi. Sorkar laipuiin vawk tha chi man to takin Mizorama vulh tur a lei tih a sawi a, mobile veterinary unit hmangin doctor te’n thingtlang khaw hrang hrangah ran entirna leh enkawlna an buatsaih thin thu te, hetiang hi India ramah a ti hmasa ber an nih thu te a sawi.
Excise minister-in lirthei leh hmanraw mamawh thu sawi
