Daily Newspaper

Exit protocol thar angin Covid positive chhuahtir

19

Covid-19 kai avanga enkawl, sawrkarin a chhuahtir dan tura inkaihhruaina a siam a tihdanglam hnu ah, kar kalta khan Covid-19 kai avanga CCC-a enkawl chu endik nawn tawh loa chhuahtir a nih hnu ah, private damdawi ina endik a nihnaah a la positive tih hriat a ni a. Sawrkar inkaihhruaina hman lai angin chhuahtir tho a ni.

Thudawn danin, Thingdawl Chhim Venga nu pakhat chu 2021 July 15 khan Covid a kai tih hmuhchhuah niin, Sethawn CCC-ah enkawl tura dahluh a ni a, July 24 khan a taksaah natna langchhuak awmlo vangin chhuahtir a ni a, sawrkarin ‘discraged protocol’ thar a hman angin, sample endik nawn tawh loa chhuahtir a ni.

Ngaihthat nan tia Kolasib District Hospital-a Rapid Antigen Test hmanga an endiknaah ‘positive’ result a la nei a. Thingdawl village task force lamin thuneitute an biakrawnnaah CCC atanga dan ang taka chhuahtir/ discharged tawh chu midang kaichhawn thei tawh loa ngaih an nih thu leh, ni 7 chhung mahni in lamah self monitoring lo tih tir tura tih an nih thu te, CCC atanga chhuak tawhte mahni duhthua lo inendik nawn chu discharged protocol kalh a nih thu te hrilh an ni ta zawk tih sawi a ni.

Hemi chungchangah hian Thingdawl VLTF chairman TC Lalthangzova chuan, an district chhunga combined task force, VC te leh nodal officer-te an awm hona Whatsapp group ah zawhna an neihte a zawt a. He a zawhna hi Whatsapp group dangah pawh thehdarh a ni zui nghe nghe.

A zawhna pek chungchangah, mithiamten ruahmanna an siam dana kal a ni, tih bak medical lam thuneitute atangin chhanna mumal tak an dawng zui lem lo niin TC Lalthangzova chuan The Aizawl Post zawhna a chhang a. CCC atanga an chhuahtir tak, sample endiknaa la positive si pawh hi, an inah uluk taka self monitoring ti turin inkhunghranna tur an nei lo a, a chhungte nen an awm ho lo thei lo tih a sawi a ni.

Mizoram sawrkarin discharge protocol thar a hman dawn tuma Health minister Dr R Lalthangliana hoa thuthar thehdarhtute an kawmnaah, medical doctor-te chuan, nikum lama an zirchiannaah, Covid-19 hri kai hi a taksaa natna a langchhuak lo a ni emaw, nasa vak loa langchhuak pawh, hri an kai tih hmuhchhuah a nih atanga ni 10 thlenna tura a hma ni thum velah an taksaah harsatna/ natna lanna a awm tawh lem lo emaw a nih chuan, an taksaa Covid hrik la chambang kha midang kai chhawng thei tur khawpin a inthlahpung thei tawh lo a, midang tan an laka hri kaichhawn a hlauhawm tawh loh, tih a nih thu an sawi. Hei hi khawvel leh India-in hrileng kaihhnawiha an rawtna leh pawmdan a lakna ber – World Health Organisation bakah Indian Council of Medical Research leh, US leh Korea Centers for Disease Control and Prevention te pawm dan pawh a ni, tiin, khawvel ram hrang hrang leh India rama state tam zawkin nikum lama an hman tawh a nih laiin, Mizoramah chuan hemi zulzui hian hman a ni ve tan dawn chauh zawk tih an sawi a ni.

“Symptom lan hma ni hnih leh a lan hnu ni 5 hi midang an kaichhawn theih nasat lai ber a ni a. Ni 5 hnu ah chuan taksaa natna dotu a rawn insiam tam tawh a, hei hian virus hi an lo bei let a, viral load a lo hniam chuan an symtpom kha a hniam a, symptom an neih tlem na na chuan, kan inkaichhawn tamna ber chu khuh leh hahchhiau leh chil per atanga inkaichhawn theihna kha a hniam tawh a ni,” tiin, heti lama sawrkarin a rawn zing ami Dr J Lalramchhuanga chuan a sawi a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy